Biznesi i kopshteve! Kërkesa të larta për çeljen e institucioneve të reja të arsimit parashkollor

Institucionet e arsimit parashkollor  shpesh janë bërë pjesë e kronikës, kjo për shkak të formave të të sjellurit dhe dhunës në disa institucione, një pjesë e të cilave ushtrojnë veprimtarinë e tyre në mënyrë të paligjshme. Vetëm në dy vitet e fundit, janë shënuar disa raste, ndër të cilët i fundi në qershor të këtij viti, ku një edukatore e një kopshti privat në kryeqytet, është vënë në pranga nga policia pasi ushtroi dhunë ndaj 2 fëmijëve të mitur.

Po ashtu një tjetër rast është edhe ai i qershorit të 2016-ës ku një fëmijë 3 vjeç u dhunua barbarisht nga administratorja e kopshtit privat, i cili rezultoi se kryente aktivitetin e tij prej vitesh pa licencë. Pas këtyre rasteve, Ministria e Arsimit dhe Sportit (MAS) në bashkëpunim edhe me institucione të tjera ngritën një task-forcë për inspektimin e të gjitha institucioneve të arsimit parauniversitar në vend. Vetëm në aksionin e bërë në shtator të vitit 2016, Ministria e Arsimit mbylli 77 kopshte private në të gjithë vendin të cilët ishin të palicencuar.

84 aplikime për këtë vit

Burime nga Ministria e Arsimit bëjnë të ditur për  revistën “SCAN Magazine“ se  inspektimet kryhen vazhdimisht për të evidentuar ekzistencën e kopshteve apo çerdheve të cilat mund të zhvillojnë aktivitetin e tyre në mënyrë jo të ligjshme. Numri i aplikimeve  për çeljen e institucioneve të arsimit parashkollor është në rritje; vetëm në periudhën janar deri në shtator të vitit 2017 janë bërë 84 aplikime për hapjen e kopshteve në rang vendi.

Nga kjo shifër, 14 aplikime janë bërë vetëm në qytetin e Tiranës. Ky institucion, së bashku edhe me institucione të tjera janë duke  punuar për të shmangur funksionimin e institucioneve të arsimit parashkollor të cilat nuk janë licencuar për ta kryer këtë shërbim. Sa i takon veprimtarisë së institucioneve parashkollore publike dhe private të licencuara , sipas drejtoreshës  për arsimin parauniversitar në Ministrinë e Arsimit, Zamira Gjini, ato monitorohen  së pari, nga njësitë arsimore të rajoneve përkatëse Drejtoritë Arsimore dhe Zyrave Arsimore (DAR/ZA-të), dhe së dyti, nga Ministria e Arsimit, Sportit dhe Rinisë nëpërmjet Inspektoriatit Shtetëror të Arsimit (ISHA). Monitorimet përfshijnë një gamë të gjerë të veprimtarisë së shkollës si Matura Shtetërore, Provimet e Lirimit, Olimpiadat, Testimi Kombëtar i nxënësve të klasave të treta dhe të pesta, Testimi i Programit Ndërkombëtar të Arritjeve të Nxënësve, Procesi i votimit të mësuesve për përzgjedhjen e tekstit më të mirë, Regjistrimet e nxënësve në klasat e X të gjimnazeve, Shpërndarja e teksteve shkollore, si dhe Kujdesi ndaj nxënësit, etj.

Viti 2017, parashikohen 20 inspektime të plota

Në dy vitet e fundit, ISHA-ja ka realizuar ndryshime thelbësore në procedurat e inspektimit, formatet e inspektimit në bashkëpunim me Inspektoratin Qendror kanë dhënë rezultate efikase në luftën ndaj informalitetit. Për herë të parë në 2016-ën, janë aplikuar masa administrative me gjobë dhe mbyllje të veprimtarisë së institucioneve arsimore fiktive, ose të palicencuara. Inspektorati Shtetëror i Arsimit gjatë vitit 2016 ka realizuar 20 inspektime të plota në 5 kopshte, 8 shkolla të arsimit bazë dhe 7 gjimnaze, në 8 DAR/ZA të vendit, me qëllim vlerësimin e cilësisë së ofruar nga institucionet arsimore, si edhe 236 monitorime lidhur me identifikimin e nevojave për zhvillimin profesional të punonjësve mësimorë.

Gjatë 4-mujorit të vitit 2017, ISHA ka realizuar 6 inspektime të plota, 9 inspektime tematike, si dhe 45 inspektime të orientuara në kopshte e shkolla të arsimit bazë dhe gjimnaze, në 8 DAR/ZA të vendit, me qëllim vlerësimin e cilësisë së ofruar nga institucioni arsimor. Ndërsa për vitin 2017, ISHA do realizojë në total 20 inspektime të plota ku janë përfshirë edhe 6 kopshte. Kryeinspektori i Inspektoratit Shtetëror të Arsimit, Bashkim Muça u shpreh  për revistën “SCAN“ se pas muajve të verës, duke filluar nga shtatori  të gjitha institucionet e parashikuara në plan do t’i nënshtrohen inspektimeve  të ISHA-së.

Tarifat e licencimit

Kopsht                                                35 mijë lekë

Shkollë fillore                                      45 mijë lekë

Shkollë 9-vjeçare                                 55 mijë lekë

Shkollë e mesme e përgjithshme      70 mijë lekë

Shkollë e mesme profesionale             60 mijë lekë

Nertila Doko/SCAN Magazine

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.