Çfarë kërkojnë bizneset shqiptare? – Barometri i Ballkanit: 81% duan likuiditet nga qeveria. Jemi më pesimistët në rajon

“Barometri i  Ballkanit 2020” i publikuar nga Këshilli i Bashkëpunimit Rajonal (RCC)  reflekton jo vetëm situatën në të cilën ndodhet biznesi shqiptar gjatë krizës së rëndë që ka goditur vendin dhe botën, por mundëson edhe një krahasim mes vendeve të rajonit. Barometri i jep përgjigje edhe pyetjes se për çfarë kanë nevojë më shumë bizneset shqiptare në këtë periudhë; likuiditet. Rreth 81% e bizneseve shqiptare në anketuara thonë se kanë nevojë pikërisht për likuiditet kur pyeten se cilat janë masat kryesore që ata kërkojnë nga qeveria.

Kjo normë është më e larta mes të gjitha vendeve të tjera të Ballkanit Perëndimor, si dhe është kërkesa kryesore e bizneseve shqiptare. Kërkesa e tyre e dytë, me 63%, është ajo e shtyrjes së taksave. Kjo është norma e dytë më e lartë në rajon pas Kosovës. Kërkesa e tretë ndërkohë është ajo e uljes së përkohshme të pagesës së kontributeve shoqërore të punonjësve, si dhe ajo e kontributeve individuale. Më pas ndjekin: aksesi direkt në financim e hua dhe subvencionet direkte. Në vend të fundit qëndron kërkesa për ulje të penaliteteve për mospagesën e kësteve. Një tjetër e dhënë ndërkohë rezulton shqetësuese.

Vetëm 4% e bizneseve shqiptare mendojnë se i kanë burimet financiare për të vijuar operimin pas krizës. Kjo është norma më e ulët në Ballkanin Perëndimor. Një e katërta e bizneseve ndërkohë, rreth 23% e tyre, mendojnë se, situata do t`i rikthehet normalitetit pas më shumë se 1 viti. Kjo është norma më e lartë mes vendeve të rajonit. 69% e bizneseve të anketuara ndërkohë, shprehen se, ekonomisë shqiptare do t`i duhet deri në 2 vite për t`u rimëkëmbur nga kjo krizë. Edhe kjo është norma më e lartë mes vendeve të rajonit.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.