Cilat janë ushqimet që nuk skadojnë kurrë (ose thuajse)?

Kjo tortë me fruta ka 106 vite dhe është gjetur në gjendje thuajse perfekte në Antarktidë. Ndoshta i përkiste kapitenit Robert Falcon Scott, eksploruesit të pafat që arriti në Polin e Veriut dhe që humbi jetën sëbashku me anëtarët e ekspeditës së tij gjatë rrugës së kthimit. Pas më shumë se 1 shekulli, torta është vlerësuar se është e konsumueshme. Sipas “Focus”, me siguri temperaturat shumë të ulëta kanë ndikuar në konservimin e saj.

Kripa

Me mijëra vjeçarë është përdorur për të ruajtur ushqimet. Mekanizmi është i thjeshtë: Kripa tërheq ujin, duke e bërë ushqimin pak të shijshëm për bakteret që mund ta prishin. Pa ujë, në fakt bakteret nuk mund të shumohen. Është e vetëkuptueshme se kripa nuk ka datë skandence.

Çokollata e zezë

Mund të ruhet në gjendje të mirë edhe për 2 vite, shumë më tepër se çokollata me qumësht. Po substanca e bardhë, e ngjashme me mykun që e mbulon, bën keq? Përgjigja është JO. Pllakat e çokollatës marrin cilësi nga temperimi i tyre, përpunimi që i lejon të formojnë kokrriza gjalp kakaoje të strukturuara në mënyrë që të favorizojnë shkrirjen e menjëhershme në gojë. Kur arrijnë temperaturën 20 gradë celcius disa kokrriza mund të modifikohen dhe të ri-kokrrizohen duke formuar një veshje të bardhë në sipërfaqe. Kjo nuk nënkupton se çokollata nuk mund të konsumohet, por shija dhe fortësia nuk janë më të njëjtat. Ndaj, ruajeni gjithnjë çokollatën tuaj në temperatura nën 20 gradë celcius.

Sheqeri

Ashtu si kripa, thith ujin nga ushqimet në të cilat gjendet. Ndaj përdoret për ruajtjen e ushqimit, si për shembull të marmalatës. Nganjëherë përdoret sëbashku me kripën, si në rastin e specialiteteve të ushqimeve në vendet nordike.

Perimet dhe farërat e thata

Sekreti i jetëgjatësisë së tyre është mungesa e ujit që i bën të pasulmueshme nga bakteret dhe myku. Mungesa e ujit ndalon enzimat që do të bënin çeljen e farës. Nëse paketohen apo mbështillen mirë mund të jenë një burim i mirë proteinash edhe shumë vite pas vjeljes së tyre.

Mjalti

Është padyshim një nga ushqimet më të pabesueshme të natyrës dhe mes shumë vetive të tij është edhe rezistenca ndaj kohës. Mjalti që përmbante varri i një faraoni është gjetur pas 3.300 vitesh dhe është akoma i konsumueshëm. Megjithatë, mjalti që konsumojmë zakonisht ka datë skadence (e detyrueshme nga ligji). Rezistenca e gjatë e tij vjen falë prezencës së ulët të ujit dhe prezenca e sheqerit që e bën praktikisht të mbrojtur nga sulmi i baktereve.

Uthulla

Mund të konsiderohet si verë apo si musht i prishur dhe duket sikur nuk ka datë skandence. Ruajtja e gjatë vjen falë baktereve të llojit “Acetobacter” që oksidojnë etanolin në pijet alkoolike dhe që pengojnë bakteret e tjera për t’u populluar. Me kalimin e viteve asnjë lloj uthulle nuk bëhet e rrezikshme për shëndetin: disa ndërrojnë ngjyrë ose shije, por uthulla e bardhë mbetet e pandryshueshme.

Orizi  

Nëse ruhet në temperaturë të ulët (rreth 3 gradë celcius) dhe në mungesë oksigjeni, mund të zgjasë deri në 30 vite. Orizi integral, shpesh i konsideruar si më i shëndetshëm, skadon më shpejt. Krundet e tij me fibroza në fakt përmbajnë yndyrna të pangopura, të cilat mund të prishen. Kur orizi ka aromë të ngjashme me bojën, është më mirë ta hidhni.

Salca e sojës

Mund të zgjasë më shumë se 3 vite, sepse ashtu si uthulla, është e fermentuar tashmë. Ndër të tjera, ka përmbajtje të lartë kripe.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.