COVID-19 prek bizneset në Tiranë – 6-mujori, bie numri i subjekteve të reja
Epidemia COVID-19 ka ndikuar “jetën” e bizneseve në kryeqytet. Referuar të dhënave zyrtare të Drejtorisë së Përgjithshme të Taksave dhe Tarifave Vendore Tiranë, numri i biznesve të reja neto të hapura në gjysmën e parë të këtij viti ka pësuar rënie krahasimisht me të njëjtën periudhë të 2019-ës. Sipas të dhënave të përpunuara nga TV SCAN, vihet re se për periudhën Janar-Qershor 2020, në kryeqytet janë hapur 2016 subjekte të reja neto, kryesore dhe sekondare. Shifër kjo që ka ardhur rënie krahasimisht me 6-mujorin 2019, ku numri i subjekteve të reja neto regjistrohej në 2663 të tilla.
Sa i takon gjysmës së parë të këtij viti, në total janë hapur 3711 subjekte të reja kryesore dhe sekondare, ndërsa kanë ulur qepenat 1695 të tjera. Ajo që vihet re është se numri më i lartë i subjekteve është hapur në 3 mujorin e parë të vitit, dhe pse bllokimi i jetës ekonomike nga pandemia filloi nga data 10 Mars, dhe po ashtu edhe numri më i madh i bizneseve të mbyllura është po gjatë kësaj periudhe. Më së shumti, i prekur ka qenë sektori i shitjeve me pakicë.
Për shkak të pandemisë, qeveria mori masa drastike ku për pothuajse dy muaj u bllokua aktiviteti i pjesës më të madhe të biznesve në vend, ku më së shumti u prekën subjektet e vogla. Ndërsa edhe pas rihapjes së jetës ekonomike, u vu re rënie e konsumit.
Bizneset Janar-Qershor 2020
Subjekte të reja 3711
Subjekte të mbyllura 1695
Subjekte të hapura neto 2016
Biznese të reja neto
Janar- Qershor 2019 2663 subjekte
Janar-Qershor 2020 2016 subjekte
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.