Ekipi i FMN në Tiranë, SCAN zbardh axhendën! Takime e diskutime intensive në Ministrinë e Financave për buxhetin, borxhin e planin 4 vjeçar

Ekipi i Fondit Monetar Ndërkombëtar ka nisur sot turin e takimeve në zyrtarët e lartë të shtetit shqiptar. Misioni i FMN-së do të jetë në Tiranë në një seri takimesh të ngjeshura duke nisur nga dita e sotme deri me 3 tetor.

Gazetarja e televizionit SCAN Violeta Shqalsi ka zbardhur axhendën e takimeve që do të ketë misioni i FMN. Dy takimet e paradites së sotme kanë qenë me ministrin e Financave Arben Ahmetaj dhe me Guvernatorin e Bankës së Shqipërisë Gent Sejko. Temë diskutimi e takimit me ministrin e Financave, referuar axhendës, ka qenë për zhvillimet e fundit, progresi që është arritur me reformat strukturore e fiskale, axhenda e politikave për 4 vitet e ardhshme, ristrukturimi postzgjedhor i Ministrisë së Financave etj.

Ndërkohë në takimin me Guvernatorin e Bankës së Shqipërisë axhenda parashikonte diskutime për zhvillimet e fundit ekonomike, politikat monetare dhe zhvillimet nga sektori financiar.

Gjatë pasdites parashikohen takime me drejtues të tjerë në Ministrisë së Financave ku do të diskutohet për disbursimin e kredive të reja të jashtme për periudhën 2017-2022 dhe për parashikimet e tjera makroekonomike. Po ashtu, në ministrinë e Financave do të diskutohet për nivelin e borxhit publik, buxhetin e shtetit, inflacionin etj.

Ndërkohë, dhe në Bankën e Shqipërisë do të zhvillohen takime në të cilat do të diskutohet për zhvillimet nga politika monetare.

Me 22 shtator, ekipi i FMN ka parashikuar të zhvillojë takime me drejtuesit e ministrisë së Financave dhe me zëvëndësministrin Erjon Luçi. Axhenda parashikon diskutime për investimet publike, ecurinë e projekteve infrastrukturore që janë në proces, për implementimin e ligjit të ri për financat vendore, për buxhetin e vitit 2018 dhe për planin e manaxhimit të financave publike për periudhën 2018-2021.

Po ashtu, në ministrinë e Financave, axhenda parashikon takime të gjata edhe me 26 shtator kur do të diskutohet borxhet e reja të njësive të pushtetit qendror dhe të pushtetit vendor dhe për strategjinë e parandalimit të krimit të borxheve të reja.

Po ashtu, axhenda parashikon takime e bisedime në Ministrinë e Financave me 28 shtator ku do të zhvillohen gjithashtu takime kuadrin makrofiskal dhe për ecurinë e zgjidhjes së problematikës së kredive joperformuese.

Para zgjedhjeve, përfaqësues të lartë të qeverisë shqiptare kanë paralajmëruar se këtë vjeshtë do të ketë një marrëveshje të re bashkëpunimi me Fondin Monetar Ndërkombëtar, pasi ka përfunduar programi 3 vjeçar i mëparshëm i rimëkëmbjes ekonomike. Pas përfundimit të programit, FMN në Shqipëri është në rolin e monitoruesit të ecurisë së zbatimit të rekomandimeve.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.