Ekonomia, drejt normalitetit në vitin 2021, Sejko: “Sektori bankar, kontribut pozitiv në përballimin e krizës”

Ekonomia shqiptare do t’i rikthehet normalitetit në vitin 2021. Në konferencën e fundit për mediat për këtë vit, Guvernatori i Bankës së Shqipërisë, Gent Sejko, tha se lajmet mbi progresin e vaksinave japin shpresë për të ardhmen, por në terma afatshkurtër sfidat do të jenë të mëdha.

“Lajmet e fundit mbi progresin e vaksinave japin shpresë për përfundimin e pandemisë dhe rikthimin e situatës në normalitet gjatë vitit 2021. Këto zhvillime rritin gjasat e rikuperimit gradual por të vazhdueshëm të aktivitetit ekonomik në horizontin afatmesëm, por situata epidemiologjike vijon të paraqesë sfida serioze për ecurinë e ekonomisë në afatin e shkurtër”.

Gjithashtu, Sejko tha se gjatë dy muajve të fundit inflacioni ka pasur një tendencë në rritje, duke iu afruar më shumë objektivit të poshtëm të Bankës së Shqipërisë. Ndërsa ekonomia ka shënuar një kthesë në tremujorin e tretë të vitit, por vijon të operojë poshtë potencialeve.

“Inflacioni i çmimeve të konsumit shënoi një vlerë mesatare prej 1.8% në muajt tetor e nëntor, duke ardhur në rritje kundrejt nivelit mesatar prej 1.4% të shënuar në tremujorin e tretë. Ecuria e inflacionit gjatë muajve të fundit është ndikuar më së shumti nga faktorë të ofertës, të cilët kanë diktuar dhe luhatjen e çmimeve të ushqimeve. Nga ana tjetër, presionet inflacioniste, të cilat burojnë nga kërkesa agregate dhe nga ambienti i huaj, vijojnë të mbeten të ulëta. Ekonomia shqiptare ka shënuar një kthesë drejt rikuperimit në tremujorin e tretë. Megjithatë, aktiviteti ekonomik në vend vijon të mbetet poshtë nivelit potencial, ndërsa rikuperimi i tij pritet të jetë një proces gradual dhe i rrethuar me rreziqe”.

Sekjo përgëzoi sektorin bankar për kontributin e dhënë në  përballimin e krizës së pandemisë së Covid-19.

“Sektori bankar ka dhënë një kontribut pozitiv në përballimin e krizës. Rritja e kreditimit ka ndihmuar me likuiditet bizneset dhe familjet në vështirësi të përkohshme, si dhe ka mbështetur vijimin e investimeve. Po ashtu, shtyrja e pagimit të kësteve të kredisë për kategori të caktuara huamarrësish dhe ristrukturimi i kredive për kategori të tjera, ka zhvendosur një pjesë të barrës financiare të krizës në bilancet e këtij sektori”.

Në mbyllje të takimit të dhjetorit, Këshilli Mbikëqyrës i Bankës së Shqipërisë mbajti të pandryshuar normën bazë të interesit, në nivelin 0.5%, dhe normat e interesit të depozitave dhe kredive njëditore, respektivisht në nivelin 0.1% dhe 0.9%.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.