Financimi i bujqësisë – Peleshi: Masa e përfitimit rritet me 25 % për fermerët e rinj

Skemat e financimit në bujqësi do t’i japin prioritet të veçantë mbështetjes së të rinjve. Ministri i Bujqësisë dhe Zhvillimit Rural, Niko Peleshi gjatë një bashkëbisedimi me të rinj në Pogradec, u bëri apel të aplikojnë, ndërsa bëri me dije se për këtë kategori është vendosur që  masa e përfitimit rritet me 25 %.

“Në Skemën tonë të mbështetjes ka mundësi që fermerët, blegtorët, peshkatarët, agropërpununimi, stabilimentet e përpunimit të peshkut, po veçanërisht ka një theks për të rinjtë.  Bizneset e të rinjve, qofshi këtu biznese fillestare, pra start up–e, apo zgjerime të bizneseve ekzistuese. Në qoftë se aplikojnë të rinjtë dhe për konvencion kemi vendosur moshën 35 vjeç, pra nga 22 deri në 35 vjeç, masa e përfitimit rritet me 25 %.”

Mbështetje do të ketë edhe për agroturizmin, kryesisht për bujtinat, deri në 2 milion lekë.

“Ne mbështesim deri në 20 milionë lekë të reja apo 200 mijë lekë të vjetra këto struktura. Edhe në qoftë se, natyrisht gjysmën, 50 % duhet të investohet nga vetë investitorët privatë, edhe në qoftë se këto mundësi nuk i kanë, ka mundësi kreditimi nëpërmes Fondit të Garancisë, që mbështetet nga qeveria shqiptare dhe nga BERZH-i, pra kredi me interesa të buta dhe me kërkesa kolaterali modeste nga 5-6 banka, që janë pjesë e këtij fondi”.

Sipas Ministrit në 100 fshatrat e përzgjedhur, ku në zonën e Pogradecit përfshihen Lini dhe Tushemishti, mbështetet çdo lloji aktiviteti i të rinjve, jo domosdoshmërisht nga fusha e bujqësisë, me një grant prej 500 mijë lekësh.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.