Fitimi i bankave – 12.6 mld lekë për shtatëmujorin

Sistemi bankar i rriti sërish fitimet gjatë muajit korrik. Sipas të dhënave nga Banka e Shqipërisë, fitimi progresiv i shtatëmujorit kishte vlerën e 12.6 miliardë lekëve, në rritje të mëtejshme nga fitimi prej 11 miliardë lekësh i gjashtëmujorit. Ndërsa kundrejt të njëjtës periudhë të vitit të kaluar, fitimi ka pësuar një rënie me 10%.

Kthimi nga kapitali i sistemit bankar ishte në nivelin 14.6%, shifër e kënaqshme duke konsideruar problematikat e lidhura me nivelin ende të lartë të kredive me probleme dhe me ecurinë e ngadaltë të kredidhënies. Për sa i takon ndarjes së fitimeve brenda sistemit, ato ngelen mjaft të përqendruara kryesisht te dy bankat më të mëdha.

Megjithatë, faktori më përcaktues në ruajtjen e fitimeve të larta edhe këtë vit është përmirësimi i cilësisë së aktiveve të bankave. Sipas Bankës së Shqipërisë, në fund të korrikut, raporti i kredive me probleme ishte 13.4%, në nivele pothuajse të njëjta me muajin qershor. Krahasuar me një vit më parë, raporti i kredive me probleme është ulur me mbi dy pikë përqindje.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.