Fjala e parë si ministër, Gent Cakaj: Transferimi i pushtetit nuk nënkupton asnjë ndryshim objektivash strategjike për Shqipërinë!

Fjalimin që duhej të mbante kryeministri Edi Rama pas marrjes së detyrës së ministrit për Europën e mbajti zëvëndësministri Gent Cakaj që do të ushtrojë detyrën pas delegimit të kompetencave nga kryeministri. Në fjalën e tij të parë në cilësinë e ministrit në funksion, Cakaj tha se “5 muajt e ardhshëm do të jenë një periudhë pune pa orar që do të shpërbëjnë çdo kufi mes natës e ditës” duke iu referuar punës që vendi duhet të bëjë për çeljen e negociatave për anëtarësim. Ministri i ri tha se do t’i kushtohet vëmendje e veçantë përmbushjes së detyrimeve që vijnë si rrjedhojë e procesit integrues, me qëllim pasjen e një performance sa më cilësore në përafrimin e legjislacionit dhe në procesin e shqyrtimit të kapitujve të integrimit.

Ndërsa falenderoi paraardhësin e tij, Ditmir Bushati për punën e parë, Cakaj tha se nuk do të ketë ndryshime objektivash e prioritetesh në politikën e jashtme të vendit.

“Ky transferim pushteti institucional nga zoti Bushati, që e falenderoj nga zemra për kontributin e tij në këtë ministri, tek unë nëpërmes kryeministri Rama, që në fakt nuk di as si ta falenderoj për besimin e dhënë dhe kujdesin e treguar ndaj meje, nuk nënkupton asnjë ndryshim objektivash strategjike të qeverisë shqipatre në kuadrin e politikës së jashtme” tha Cakaj.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.