FMN rishikon Shqipërinë – Rritje më e madhe këtë vit, por ngadalësim vitet e ardhshme
Fondi Monetar Ndërkombëtar ka rritur ndjeshëm projeksionet e rritjes ekonomike të vendit tonë gjatë këtij viti, por që marrin më shumë formën e një korrigjimi të shifrave të mëparshme.
Ndërkohë që 6 muaj më parë, institucioni me bazë në Washington projektonte një normë rritje në 3.7% për ekonominë e vendit tonë, tashmë flet për një normë në 4%, parashikim i njëjtë me atë të Bankës Botërore pak ditë më parë.
Rishikimi në territor pozitiv i projeksioneve vjen si pasojë e shifrave më të fundit që flasin për një rritje ekonomike gjatë tremujorit të kaluar në 4.3%. Sa i përket vitit të ardhshëm ndërkohë, projeksionet janë shkurtuar lehtë, nga 3.8% rritje ekonomike që projektohej, në 3.7%.
Ky duket se është lajm i keq për ekonominë shqiptare, pasi përkthehet në një ngadalësim jo të papërfillshëm.
Rishikimi në rënie i projeksioneve për vitin e ardhshëm duket se është rrjedhojë e përfundimit të dy projekteve madhore, TAP dhe Devolli, të cilat gjatë viteve të fundit kanë nxitur rritjen ekonomike të vendit.
FMN projekton gjithashtu që në 2023 rritja ekonomike të mos t`i kalojë 4%, ç`ka përbën gjithashtu një lajm jo shumë të mirë për ekonominë shqiptare, në një kohë që sipas ekspertëve por edhe vetë qeverisë rritja duhet të jetë në mbi 5% në mënyrë që të ndihet te qytetarët.
Gjithsesi, Fondi Monetar Ndërkombëtar është institucioni më konservator mes ndërkombëtarëve, sidomos në drejtim të shifrave dhe projeksioneve. Të dhënat e FMN tregojnë se deri në vitin 2023, Shqipëria do të jetë ekonomia me rritjen më të shpejtë në rajon.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.