Fqinjët kanë 7.5% të tregut/ Biznesi i vendeve të rajonit në Shqipëri u tkurr në 2018

Bizneset nga vendet e rajonit zotërojnë afërsisht 7.5% të tregut shqiptar. Të dhënat e Instat tregojnë se vitin e kaluar pjesa e këtyre ndërmarrjeve ndaj shitjeve totale në ekonominë shqiptare pësoi rënie nga niveli 8.1% i një viti më parë. Bizneset nga rajoni kanë një peshë në rënie edhe në punësim, me 4.2% të totalit, nga 7.2% që punësonin një vit më parë.

Në të gjithë treguesit, sipërmarrja e huaj në përgjithësi humbi terren në tregun shqiptar gjatë vitit të kaluar. Megjithëse në tërësi edhe numri i bizneseve të huaja vitin e kaluar rezultoi në rënie, përmasat e kësaj rënieje ishin ndjeshëm më të theksuara për ndërmarrjet nga Ballkani Perëndimor.Në fund të vitit 2018 në Shqipëri vepronin 645 ndërmarrje me pronarë nga vendet e Ballkanit Perëndimor, 100 më pak krahasuar me vitin 2017.

Bizneset nga rajoni zënë vetëm 10% të numrit të përgjithshëm të ndërmarrjeve të huaja, peshë kjo relativisht e ulët, po të kemi parasysh afërsinë gjeografike dhe lidhjet kombëtare që ekzistojnë sidomos me Kosovën dhe Maqedoninë e Veriut. Këto vende, kutpueshëm, dominojnë në strukturën e ndërmarrjeve nga Rajoni, ku 66% janë kosovare dhe 23% maqedonase.

Statistikat tregojnë se bizneset nga vendet fqinje janë të përqendruara në shërbime, në përputhje me strukturën e përgjithshme të ndërmarrjeve në ekonominë shqiptare.  Në pjesën dërrmuese, bëhet fjalë për biznese të vogla, me më pak se 9 të punësuar. Nga 645 ndërmarrje me kapital nga rajoni gjithsej, vetëm 5% e tyre punësojnë më shumë se 10 vetë.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.