Garda merr para shtesë për mbrojtjen e personaliteteve! Ndryshon sërish buxheti 2021
Buxheti i këtij viti ka ndryshuar sërish duke rishpërndarë fondet e ministrisë së Brendshme. Këshilli i Ministrave ka miratuar vendimin për rritjen me 31 milionë lekë të fondit të shpenzimeve korrente për Gardën e Republikës.
Ky fond do të përdoret për plotësimin e nevojave për shpenzime personeli dhe shpenzime të tjera, për shkak të ndryshimeve të strukturave të Gardës në numrin e personelit, numrin e mjeteve dhe personaliteteve për t’u marrë në ruajtje, si Organet e Vlerësimit Kalimtar, SPAK dhe BKH.
Fondi prej 31 000 000 (tridhjetë e një milionë) lekësh do të përballohet nga pakësimi i buxhetit për programin “Gjendja Civile”, në zërin “Shpenzime korrente”, në shumën 21 00 000 (njëzet e një milionë) lekë, dhe në programin “Prefektura”, në zërin “Shpenzime korrente”, në shumën 10 000 000 (dhjetë milionë) lekë.
Ngarkohen Ministria e Brendshme dhe Ministria e Financave dhe Ekonomisë për zbatimin e këtij vendimi.
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.