Gjermania dhe Franca kthejnë në shtëpi 157 azilkërkues shqiptarë. Policia e Shtetit: Në rënie numri i shtetasve që kërkojnë azil, shkak masat shtesë që u morën në fillim të Gushtit (VIDEO)

Vijon kthimi nga vendet e BE-së, si Franca dhe Gjermania, i shtetasve shqiptarë që kishin kërkuar azil për motive ekonomike dhe shëndetësore.

Konkretisht janë riatdhesuar 157 shtetas, nga të cilët 131 janë kthyer nga Gjermania, dhe 26 nga Franca.

“Frontex në bashkëpunim me Policinë e Shtetit, Policinë Franceze dhe Gjermane ka organizuar tre fluturime me charter për të riatdhesuar shtetasit shqiptarë që kishin kërkuar azil në këto vende. Policia e Shtetit po bashkëpunon ngushtësisht me të gjitha policitë partnere për të riatdhesuar të gjithë ata shtetas që kërkojnë azil në vendet e BE-SË”, thuhet në njoftimin e Policisë së Shtetit .

Masat shtesë të marra në fillim të muajit Gusht kanë sjellë një rënie të shtetaseve që kërkojnë të shkojnë në vendet e BE-së me qëllim kërkimin e azilit.

“Policia e Shtetit iu bën thirrje të gjithë atyre që tentojnë apo përpiqen të gjejnë rrugë të ndryshme , të mos bien pre e mashtrimeve , të mos bëjnë shpenzime të kota, pasi shanset për azil në vendet e BE-së janë zero. Të gjithë ata shtetas që kërkojnë një shkollim më të mirë, që duan të gjejnë punë të ligjshme, kanë të gjitha mundësitë dhe rrugët ligjore për ti kërkuar në vendet e BE-së”, thuhet në njoftim.

os.de/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.