Gjiknuri në Uzinën e Ferrokromit në Burrel: 28 mln USD në arkën e shtetit, më shumë të punësuar
Investimet e kryera në Uzinën e Ferrokromit në Burrel, jo vetëm kanë dyfishuar kapacitetin prodhues, por kanë rritur edhe të ardhurat në arkën e shtetit, si dhe kanë rritur numrin e të punësuarve. Kjo uzinë do të prodhojë 36,000 ton ferrokrom në vit, nga rreth 17,000 ton/vit që ishte vetëm një vit më parë produkt i cili shkon 100% ne eksport.
Gjatë vitit 2017, shoqëria koncesionare ka kryer 11 milion USD investime duke rehabilituar një furrë të vjetër, ndërtuar një të re, ashtu sikurse sistemet e dozimit të furrave, impiantet e copëtimit dhe sitosjes së mineralit të kromit, sistemin ftohës, vinçat, repartet e shkrirjes dhe derdhjes dhe mekanizmin deri në përpunimin final të ferrokromit të gatshëm për eksport.
“Jemi duke studiuar mundësinë e hapjes së një furre të tretë për prodhimin e ferrokromit. Ky investim i ri llogaritet të shkojë në rreth 10 milion USD dhe të hapë vende të reja pune”, u shpreh drejtuesi teknik i Uzinës.
Ministri i Infrastrukturës dhe Energjisë Damian Gjiknuri duke parë nga afër investimin, vuri theksin tek efektiviteti i masave të marra nga qeveria për ringjalljen e industrisë së kromit.
“Po të kujtojmë, para shumë vitesh, kjo uzinë qe totalisht e braktisur. Falë investimeve private dhe politikave nxitëse të qeverisë sot kemi një industri që po shtohet. Kemi dyfishim të kapacitetit por çfarë do të thotë kjo për ekonominë shqiptare? Vetëm kjo uzinë e ferrokromit i jep ekonomisë shqiptare 28 milion USD më shumë. Pra, nëse ky krom që përpunohet këtu do të eksportohej mineral në tregjet e eksportit, ekonomia shqiptare do të humbte 28 milion USD. Sot që flasim, këto 28 milion USD janë përkthyer në investime, janë përkthyer në punësim, janë përkthyer në një zinxhir ekonomik që prek edhe shumë sektorë të tjerë të lidhur me industrinë e kromit”, u shpreh Gjiknuri.
Më tej, ai nënvizoi se investimet kanë rritur kapacitetet përpunuese brenda vendit duke tejkaluar edhe prodhimin e e ferrokromit të para viteve ’90 ndërsa sqaroi se vetëm kjo uzinë punëson 180 persona me paga mesatare 60,000 lekë të reja në muaj.
Ministri Gjiknuri nënvizoi se shumë shpejt do të mund të fillojë puna edhe në minierën e Vllanës.
“Shumë shpejt fillon puna në minierën e Vllanës. Shumë shpejt edhe aty do të kemi ringjalljen e asaj miniere, shtimin e prodhimit, ngritjen e impiantit të koncentrimit të kromit dhe shtimin e prodhimit të kromit në vend. Praktikisht, edhe politika e re nxitëse për të dekurajuar eksportet dhe nxitur përpunimin e kromit brenda vendit, do të japë një vlerë të shtuar për ekonominë shqiptare. Shembulli konkret i punës dhe suksesit është ky: investim, punësim, rritje e kapaciteteve prodhuese, rritje e të ardhurave për ekonominë kombëtare. Ky është edhe synimi i kësaj qeverie përsa i përket industrisë minerare”, theksoi Gjiknuri.
E.Z/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.