Gledis Nano takim me ambasadoren Yuri Kim – Biseda në kuadër të bashkëpunimit dhe ligj zbatimit

Drejtori i Përgjithshëm i Policisë së Shtetit Gledis Nano dhe ambasadorja e SHBA-së në Shqipëri, Yuri Kim, kanë mbajtur një takim gjatë ditës së sotme si dhe një dalje në konferencë për mediat.

Drejtori i Përgjithshëm i Policisë së Shtetit Gledis Nano  u shpreh se: “Takimi u krye në kuadër të bashkëpunimit që policia e shtetit ka me gjithë agjencitë ligj zbatuese të Shteteve të Bashkuara. Siç dihet SHBA janë partneri ynë strategjik dhe kemi mbështetjen kryesore të policisë së shtetit për trajnimet, asistencën, logjistikën dhe konsulencën kështu që e vlerësoj shumë këtë bashkëpunim, dhe i sigurova zonjës ambasadore që policia e shtetit do të jetë në nivelet më të larta të performancës për të luftuar krimin e organizuar dhe korrupsionin dhe patjetër kërkova dhe mbështetjen e vazhdueshme që Shtetet e Bashkuara dhe agjencitë ligj zbatuese mund të japin për policinë e shtetit”.

“Kjo është një luftë që nuk mund të bëhet asnjëherë vetëm, dhe duke ditur mbështetjen që ne kemi patur deri tani, unë jam shumë i bindur që bashkë do t’ja dalim për të pasur rend dhe siguri më tepër në vendin tonë dhe absolutisht për të mbështetur dhe ne Shtetet e Bashkuara në mbrojtjet e interesave të qeverisë dhe të jetës dhe interesave të qytetarëve amerikanë”, përfundoi Nano.

Gjatë fjalimit të saj ambasadorja e SHBA-së në Shqipëri, Yuri Kim u shpreh: “Pata një takim shumë të mirë këtë mëngjes me zotin Nano , pasi erdha për ta takuar dhe përgëzuar për pozicionin e ri. Gjithashtu ri konfirmova që bashkëpunimi ndërmjet Shqipërisë dhe Shteteve të Bashkuara mbi çështjet e ligj zbatimit mbetet i rëndësishëm. Ne do të vazhdojmë të ofrojmë sa më shumë mbështetje që të jetë e mundur që nga pajisjet, trajnimet dhe çfarëdo lloji tjetër mbështetje. Gjithashtu diskutuam rëndësinë që policia të mund të ruaj dhe të risi besimin e publikut me integritetin e tyre”.

“Unë dhe zoti Nano jemi të dy mbështetës shumë të mëdhenj të policisë. Ne gjithashtu e dimë që policia e shtetit ndërmerr rreziqe të mëdha dhe madje ndonjëherë edhe duke humbur jetën e tyre thjesht për të ruajtur ligjin edhe rendin. Gjithashtu diskutuam rëndësinë se si ligj zbatimi të mund të ruhet nga çfarë do lloji influence apo ndikimi që vjen nga jashtë”, shtoi ambasadorja.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.