Greqia hap kufijtë për Shqipërinë – Vendimi në fuqi më 15 qershor, vetëm 20 shtete në listën e “bardhë”
Greqia do të hapë kufijtë më 15 qershor për 20 shtete, situata epidemiologjike e të cilave vlerësohet si e qëndrueshme, mes të cilave edhe Shqipëria. Pjesë e listës janë edhe të gjitha vendet e rajonit me përjashtim të Kosovës. Ndër vendet e Europës perëndimore figuron edhe Gjermania, ndërkohë që mungon Italia apo Spanja. Nga ky vendim i ekzekutivit helen do të përfitojnë edhe mijëra punëtorë sezonal nga Shqipëria.
Arritjen e një marrëveshje verbale me autoritetet greke për këtë çështje e ka njoftuar disa ditë më parë edhe vetë kryeministri Rama. Por, hapja e kufinjve mund të shërbejë edhe për turistët e huaj, paçka se sipërmarrja vendase, por edhe qeveria ka apeluar vazhdimisht që këtë vit turizmi të jeta vendas, në mënyrë që t`i jepet një dorë ekonomisë, e cila varet në masën 25% nga turizmi. Për disa vende që s`janë pjesë e listës, kufijtë do të hapen më 1 korrik, ndërsa për ato vende me situatë të rënduar epidemiologjike do të hapen më 15 korrik.
Greqia parashikon që këtë vit të ketë një sezon turistik sadopak brenda normalitetit. Për ata që do të hyjnë në Greqi do të ketë teste shëndetësore rastësore njoftojnë autoritetet helene, ndërkohë që në strukturat turistike do të jenë në fuqi protokollet shëndetësore.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.