Grupi i “Vishegradit” del publikisht PRO hapjes së negociatave me Shqipërinë dhe Maqedoninë

Grupi i vendeve të Vishegradit mbështet pranimin e Shqipërisë dhe Maqedonisë së Veriut në Bashkimin Europian. Kryeministrat e aleancës, të Republikës Çeke, Hungarisë, Polonisë dhe Sllovakia dhanë një deklaratë për median gjatë një takimi me homologët e Ballkanit Perëndimor në Pragë duke theksuar mbështetjen e plotë për çeljen e negociatave.

“Vishegradi dëshiron të mirëpresë anëtarë të rinj në Bashkimin Europian dhe mbështet plotësisht hapjen e negociatave të pranimit për Maqedoninë e Veriut dhe Shqipërinë këtë vit” tha kryeministri sllovak, Peter Pellegrini për mediat.

4 anëtarët e Visegradit theksuan gjithashtu, se reformat e miratuara nga Bosnjë Hercegovina dhe Kosova do të forcojnë shpresat e Maqedonisë dhe Shqipërisë për t’u anëtarësuar në BE.

“Ribashkimi i Europës nuk mund të jetë i plotë në rast se i gjithë rajoni i Ballkanit Perëndimor nuk bashkohet me procesin e integrimit europian” u shpreh kryeministri çek dhe njëkohësisht kreu i Visegrad, Andrej Babiš .

Babiš shtoi se politikat e zgjerimit të BE janë mjeti më efikas për të mbështetur stabilitetin, sigurinë, demokracinë dhe prosperitetin në Ballkanin Perëndimor.

“Nëse BE do të ishte ‘kujdesur’ për  Maqedoninë e Veriut dhe Serbinë si anëtare, do të kishte më pak emigrantë të paligjshëm në Evropë”  theksoi kryeministri hungarez, Viktor Orbán.

Në fakt, emigracioni ka qenë jo pak herë burim debatesh. Vendet  e “V4” janë ‘përleshur’ me anëtarët tjerë të BE për politikën e migracionit, pasi disa prej tyre refuzuan të pranojnë emigrantë dhe azilkërkues gjatë krizës së emigrantëve në Europë në 2015.

Grupi i Vishegradit (V4) është një aleancë kulturore dhe politike e 4 shteteve të Europës Qendrore që janë pjesë e Bashkimit Europian e NATO-s; Republikës Çeke, Hungarisë, Polonisë dhe Sllovakisë. Grupi ka marrë emrin nga qyteti i Vishegradit në Hungari ku u zhvillua samiti i liderëve i vitit 1991. Të katërt vendet e grupit të Vishegradit u anëtarësuar në bllok në Bashkimin Europian në 1 maj të vitit 2004.

Jenida Vladi/ SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.