Hapa prapa me korrupsionin/Transparency International: Shqipëria, ndër 3 më të korruptuarat në Europë
Shqipëria ka humbur plot 8 pozicione në indeksin global të perceptimit të korrupsionit 2018, të publikuar nga Transparency International. Ky është indeksi më prestigjioz në nivel global sa i përket matjes së korrupsionit.
Kështu, në raportin e fundit, vendi ynë klasifikohet i 99-ti në botë, ndër 180 ekonomi të globit. Një vit më parë ndërkohë, mbante vendin e 91-të.
Kjo ka bërë që Shqipëria të pozicionohet si një ndër 3 vendet më të korruptuara në Europë, më mirë vetëm se Moldavia dhe Ukraina, të paktën po të marrim si matës të korrupsionit perceptimin e njerëzve.
Në raportin e kaluar, vendi ynë linte pas në renditje edhe vende të rajonit, si Bosnje Hercegovina apo Maqedonia, ndërkohë që këtë vit, të dy këto vende janë më mirë se ne në renditje.
Shqipëria nuk kaq bërë hapa pas vetëm me fqinjët, por edhe me veten, pasi ka humbur dy pikë në indeksin e e përgjithshëm, nga 38 pikë në 2017, në 36 pikë në 2018, thotë Transparency International, që e nënvizon këtë mes reshtave.
Organizata numër një në botë për luftën ndaj korrupsionit thotë gjithashtu se, rënia nuk e ka ndaluar vendin tonë të jetë një ndër performuesit më të mirë që prej 2013 në drejtim të progresit në luftën ndaj korrupsionit.
Në nivel global, vendi më pak i korruptuar është Danimarka, ndërsa vendi më i korruptuar vlerësohet të jetë Somalia.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.