Hapja e bizneseve – Në janar janë regjistruar në QKB 2394 sipërmarrje të reja

Gjatë muajit janar të vitit 2018 janë regjistruar në Qendrën Kombëtare të Biznesit 2394 biznese të reja dhe janë çregjistruar 732 subjekte. Këto statistika janë bërë publike nga ministri i Financave dhe Ekonomisë, Arben Ahmetaj, përmes një postimi në profilin e tij në “Facebook.”

Sipas tij, sipërmarrjet e reja kanë shënuar një rritje me 237 më shumë krahasuar me po të njëjtën periudhë të vitit 2016.

“Efekti neto, është 1662 biznese të reja në ekonomi, nga 1425 që ishin në janar 2016, ose thënë ndryshe, një rritje prej 237 biznesesh më shumë se një vit më parë, vetëm për muajin janar”, shkruan Ahmetaj.

Ndërkohë, duke e konsideruar ende një sfidë përmirësimin e terrenit ekonomik dhe klimën e biznesit, ai e ka cilësuar si ‘të shkuar të largët’ kohën kur bizneset mbylleshin për shkak të frikës dhe pasigurisë.

G.D/SCAN  

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.