Holanda, pro rikthimit të vizave – Vasili: Lajm i keq për Shqipërinë, përgjegjëse është qeveria
Parlamenti i Holandës ka votuar pro propozimit për rikthimin e vizave me Shqipërinë, për shkak të rritjes së kriminalitetit në këtë vend. Ky votim i hap rrugën qeverisë së Holandës për t’ju drejtuar Brukselit, pasi fjalën e fundit për këtë kërkesë në rikthimin e vizave e ka Bashkimi Europian. Ndërkohë, i ftuar në studion e Televizionit SCAN, ish-deputeti i Lëvizjes Socialiste për Integrim, Petrit Vasili, e ka cilësuar vendimin e parlamentit holandez, si një lajm shumë të keq për vendit tonë, dhe përgjegjëse për këtë është qeveria Rama.
Ishin 5 parti politike në Holandë që kërkuan votim në parlament për rikthimin e vizave për Shqipërinë, me arsyetimin se ka pasur një rritje të ndjeshme të kriminalitetit nga mafia shqiptare në Holandë. Në kërkesën drejtuar parlamentit, partitë holandeze e cilësuan kërkesën si pezullim emergjence vizash, pasi shumë shqiptarë që mbërrijnë në Holandë si turistë përfshihen në trafikun e drogës dhe klandestinëve drejt Mbretërisë së Bashkuar.
Gjithsesi, pozicioni i qeverisë së Holandës ka qenë kundër propozimit për rikthimin e vizave. Ministri i Punëve të Jashtme, Stef Blok deklaroi në parlament se, ashpërsimi regjimit të vizave është i pavend dhe se do të komplikonte marrëdhëniet me Shqipërinë.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.