Huamarrja, pritet një “boom” nga pandemia – BSH: Familjet dhe bizneset, rekord historik i atyre që planifikojë të marrin kredi

Gjysma e dytë e vitit aktual, pritet të ketë më shumë kërkesa për huamarrje nga familjarët. Të dhënat më të fundit të Bankës së Shqipërisë tregojnë se, indeksi i planifikimit të huasë ka prekur nivelin më të lartë që prej 6 mujorit të dytë të vitit 2012. Ajo që bie tjetër në sy nga të dhënat është se pjesa më e madhe e atyre që planifikojnë të marrin hua, 75% e totalit janë huamarrës të rinj. Kjo është gjithashtu norma më e lartë e regjistruar ndonjëherë, të paktën që prej vitit 2013.

“Kërkesa e familjeve për huamarrje gjatë gjysmës së dytë të vitit, mund të jetë më e lartë. Rreth 58% e familjeve kanë deklaruar se “nuk presin të marrin hua të re në 6 muajt e ardhshëm”, por 42% e tyre kanë deklaruar se e konsiderojnë në shkallë të ndryshme sigurie mundësinë “për të marrë/rimarrë një hua”, dhe kjo peshë është rritur kundrejt dy vrojtimeve paraardhëse, respektivisht me 2 pikë përqindje dhe me 9 pikë përqindje”-thotë Banka e Shqipërisë në raportin e stabilitetit financiar për 6-mujorin e parë të vitit.

Edhe sa i përket bizneseve, raporti i Bankës së Shqipërisë tregon se, ka një rekord të ri historik. Për herë të parë, norma e bizneseve që deklaron se është e sigurt se do të marrin kredi në 6 muajt e ardhshëm, ka kaluar 50%, për të prekur 51.9%, ndërkohë që nga ana tjetër ka prekur minimumin historik norma e atyre që deklarojnë se nuk ka asnjë mundësi që të marrin një kredi në 6 muajt e ardhshëm.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.