Ilaçet për COVID-19, me rimbursim – Buxheti 2021/ Rritet pagesa e papunësisë, shtesë për bujqësinë, turizmin e infrastrukturën
Çdo qytetar shqiptar që do të preket me COVID-19 do të përfitojë ilaçet e trajtimit me rimbursim. Ndërkohë që është parashikuar dhe rritja e pagesës së papunësisë për shtresat në nevojë me qëllim përballimin e situatës së pandemisë. Këto janë dy ndryshimet kryesore të bëra në buxhetin e shtetit për vitin 2021, të prezantuara në Komisionin e Ekonomisë.
“Paketa e ilaçeve te COVID 19, do të jenë në paketën e ilaçeve me rimbursim. 1.2 miliardë lek do i shtohet buxhetit per kete qellim, per çdo qytetar qe preket dhe kurohet me anticovid. Nje ceshtje tjetër qe ka te beje me njerëzit ne nevoje , 1 miliardë leke per rritjen e pagesës se papunesisë, jo vetëm kompensimi i ilaçeve por dhe mundësia per te përballuar jetesën është e domosdoshme. Buxhet anticovid, antikrizë”.
Ndërkaq, një nga shtyllat kryesore të buxhetit të vitit të ardhshëm do të jetë procesi i rindërtimit dhe është vendosur që të mbështeten me fonde shtesë ministritë e linjës që garantojnë rritje ekonomike, si bujqësia, turizmi dhe infrastruktura.
“Rindërtimi mbetet thelbi, ministritë kryesore do marrin mbështetjen maksimale brenda kushteve qe te garantojnë qëndrueshmëri fiskale. Si bujqësia infrastruktura, turizmi”.
Në buxhetin e vitit 2021 është rishikuar gjithashtu formula e ndarjes së transfertës së pakushtëzuar në bashki duke u nisur nga goditja qe dha tërmeti i 26 nëntorit dhe numrit të bizneseve që kanë, duke mbështetur ato njësi që kanë më shumë vështirësi. Ndërsa janë shtuar fondet për institucionet e drejtësisë dhe institucioneve të pavarura. Buxheti ka kaluar nen për nen nga Komisioni i Ekonomisë dhe pritet të miratohet në seancën e ardhshme plenare.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.