Inspektoratët e rinj – Strukturë e veçantë për tatimet, doganat dhe lojërat e fatit
Përveç riorganizimit të inspektorateve ekzistues, Inspektorati Qendror i ka propozuar kryeministrisë krijimin e 3 strukturave të reja, të cilat nuk kanë ekzistuar deri më tani.
Sipas draftit kërkohet ngritja e Inspektoratit Shtetëror të Tatimeve, Doganave, Lojërave të Fatit, Parandalimit të Pastrimit të Parave dhe Mbikëqyrjes Financiare, i cili do të ketë në fokus pikërisht këto fusha inspektimi.
Po ashtu, propozohet të krijohet një inspektorat shtetëror ku të përfshihen si funksione inspektuese fushat e tokës, detit, ajrit dhe konkretisht siguria në: hekurudha, aviacionin civil, rrugor, postë-telekomunikacion, frekuencave audiovizive, si dhe inspektim të kontrollit teknik të automjeteve, pasi kanë qëllim të përbashkët sigurinë e trafikut dhe frekuencave.
Po ashtu, pritet të krijohet një inspektorat i ri ku të përfshihen fushat e inspektimit për profesionet e lira në shërbimin përmbarimor gjyqësor privat, për ndërmjetësimin në zgjidhjen e mosmarrëveshjeve, avokatinë, noterinë dhe arkivat. Ndërkaq, duke qenë se mbrojtja nga zjarri i ka kaluar si kompetencë inspektorateve vendore, Inspektorati Qendror kërkon ngritjen e një strukture në të gjitha njësitë administrative.
Ndërkaq, gjatë asamblesë së Partisë Socialiste, Niko Peleshi teksa prezantoi propozimet për riorganizimin e agjencive dhe institucioneve të varësisë, kërkoi krijimin e një Agjencie të Standardizimit dhe Akreditimit. Sipas tij, aktualisht ka dublikime funksionesh; përzierje të kontrollit të brendshëm me inspektimin dhe një mungesë të kualifikimit të karrierës për inspektorët. Sipas Peleshit, Agjencia e Standardeve dhe Akreditimit duhet të jetë në qendër të të gjithë inspektorateve.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.