Inteligjenca Artificiale është realitet – Ja disa nga fushat ku po gjen zbatim
Përparimet teknologjike drejt Inteligjencës Artificiale kanë gjallëruar kohët e fundit një debat global. Teksa fantastiko-shkencorja bëhet realitet, produktet me Inteligjencë Artificiale po integrohen gradualisht në shtëpitë dhe vendet e punës. Kështu natyrshëm lindin shqetësimet për efektet e mundshme negative të IA në tregun e punës.
Gjithsesi, IA ka një potencial të jashtëzakonshëm për të rikonceptuar se si i zgjidhim problemet që ka bota sot. Përmes kësaj teknologjie mund të përmirësojmë shumë gjëra si shëndetësisë, arsimin, varfërinë dhe sigurinë. Nëse zgjedhim ta përdorim për këto qëllime, IA mund të ketë një impakt pozitiv për shoqërinë, biznesin dhe kulturën, në përmasat e ndryshimeve të sjella nga interneti.
Nëse mendojmë se IA nuk po zëvendëson mendjen njerëzore, por thjesht po i jep një shkallë më të madhe, do të kuptojmë se disponojmë që tani, në një fazë që konsiderohet shumë fillestare, instrumentat e duhur për të bërë ndryshime rrënjësore. Shembujt e mëposhtëm nga industri të ndryshme na japin një skicë të asaj çfarë është e mundur nëse bashkojmë IA me aftësinë dhe zgjuarsinë njerëzore.
- Mjekësia Precize
Çdo individ është pafundësisht i ndryshëm nga tjetri, duke u bazuar tek gjenet, mjedisi, mënyra e jetesës etj. Ndaj natyrshëm duhet një trajtim mjekësor i personalizuar për gjithsecilin, ndryshe efektshmëria e tij nuk do të ishte e njëjtë tek të gjithë. Mjekësia precize i lejon doktorët dhe studiuesit të parashikojnë me saktësi se çfarë trajtimi dhe çfarë strategjie duhet ndjekur për sëmundje të caktuara në grupe të ndryshme njerëzish.
Ayasdi, një sistem inteligjent, analizon të dhënat e spitaleve dhe doktorëve për të analizuar më mirë të dhënat e tyre. Përmes punës dhe algoritmeve të kësaj Inteligjence Artificiale janë mundur të zbulohen nëngrupe të tjera më parë të panjohura të diabetit, të cilat lejojnë përmirësimin e terapive që funksionojnë më tepër për këta pacientë.Enlitic dhe IBM po përdorin algoritme të ngjashme për të dalluar tumore në skanime radiologjike me më tepër saktësi dhe eficiencë, duke përshpejtuar procesin e të gjeturit të një kure për kancerin.
- Cybersiguria
Sulmi i fundit global provoi se sa vulnerabël është i gjithë rrjeti kompjuterik. Në vitin 2015 pati 707 milionë shkelje në siguri, ndërsa ishin 554 milionë vetëm në gjysmën e parë të 2016-ës. Këto sulme mund të ndikojnë dhe manipulojnë në qeveri, zgjedhje, shërbime jetësore, e shumë fusha të tjera.
Sot ekipet për mbrojtjen nga këto sulme hasin gjithnjë e më tepër vështirësi, por automatizimi dhe aftësia për të mësuar e IA mund të rrisë efikasitetin dhe të reduktojë kostot në mbrojtjen nga cyberterrorizmi apo edhe tek rasti më i vogël i vjedhjes së identitetit.
Kompani si Secureworks po punojnë me aftësitë parashikuese të IA për të parandaluar rreziqet në një shkallë globale. Ndërkohë, programe si SiftScience, Cylance apo Deep Instinct përdorin teknologji që parandalojnë shkeljet në celularë dhe laptopë.
- Bujqësia e precizionit
Teksa popullsia e botës po rritet dramatikisht, kapaciteti prodhues i ushqimit ndodhet në vështirësi. Inteligjenca artificiale po përdoret në metodat e bujqësisë për të rritur prodhimin dhe për të reduktuar mbetjet, duke ruajtur ndërkohë edhe mjedisin.
Sisteme të ndryshme i lejojnë makineritë të mbjellin në mënyrë më uniforme dhe të saktë, për të reduktuar përplasjet në proceset agrikulturore si lërimi, mbjellja dhe fertilizimi, duke ulur edhe përdorimin e kimikateve.
Një tjetër sistem si Cainthus, përdoret për të identifikuar çdo lopë dhe për t’i transmetuar fermerit shenjat e para të çalimit, bazuar në formën e trupit.
Teksa sensorët përparojnë me zhvillimin, teknologjia e monitorimit të fushave me dronë, do të bashkërendojë me IA për të parashikuar problemet në të korra, duke u dhënë fermerëve shumë më tepër kohë të reagojnë.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.