Investimet, 4 miliardë lekë më pak për 6 muajt e parë – TVSH-ja, mbi planifikimin

Të ardhurat e qeverisë janë rritur me 2.3% gjatë gjysmës së parë të vitit në krahasim me të njëjtën periudhë të një viti më parë, të dhënat e Ministrisë së Financave flasin kështu për 216.9 miliardë lekë të ardhura në arkën e shtetit, nga 212.2 miliardë lekë gjatë së njëjtës periudhë të vitit të kaluar.

Por, në buxhet planifikohej që në Qershor të ardhurat të ishin në 224.5 miliardë lekë, çka do të thotë se, mungojnë 7.6 miliardë lekë nga plani, ose rreth 59 milionë euro.

Ndër zërat që rezulton të ketë tejkaluar planifikimin është ajo e tatimit mbi vlerën e shtuar, ku janë arkëtuar 3 miliardë lekë më shumë se ç`planifikohej fillimisht.

Sa i përket shpenzimeve ndërkohë, gjatë 6-mujorit të parë të vitit ato janë realizuar në masën 43%, ose 214.6 miliardë lekë. Një vit më parë kjo shumë fiksohej në 209.1, çka do të thotë se në terma vjetorë, rritja fiksohet në 2.6%. Edhe këtu kemi të bëjmë me një mosrealizim të objektivave paraprakë në masë 11 miliardë lekë, ose 86 milionë euro.

Sa i përket investimeve ndërkohë që figurojnë në zërin e shpenzimeve kapitale, ato janë realizuar në 29.9 miliardë lekë. Në këtë zë, planifikimi fillestar fliste për 33.9 miliardë lekë, çka do të thotë se, në apel mungojnë 4 miliardë lekë, ose 31.2 milionë euro më pak të investuara nga buxheti i shtetit për qytetarët, në forma të ndryshme.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.