Investimet në rrjetin elektrik, Gjiknuri: Përparësi zonat turistike – Ministri inspekton punimet për nënstacionin e ri në Gjirin e Lalëzit
Ministri i Infrastrukturës Damian Gjiknuri dhe administratori i OSHEE Adrian Çela inspektuan kantierin ku po punohet për ndërtimin e nënstacionit të ri në zonën e Gjirit të Lalëzit.
Gjiknuri deklaroi gjatë inspektimit se plani i investimeve do t’i japë përparësi zonave turistike.
“Investimet në këtë fazë do të fokusohen në dy drejtime: Një, duke i paraprirë zhvillimeve të mundshme apo duke investuar në ato zona që kanë potencial të madh të rritjes ekonomike, siç janë zonat me përparësi turizmi. Këtu jemi në një nga zonat, por njëkohësisht do të investohet në zonën e bregut, në zonën e Orikumit dhe në bregdetin e Velipojës në mënyrë që i gjithë brezi ku pritet një investim i madh në fushën e turizmit dhe ku do të ketë aktivitet ekonomik të shtuar do të mbulohet me një furnizim bashkëkohor të energjisë elektrike”, u shpreh ministri Gjiknuri.
Sipas ministrit të Infrastrukturës dhe Energjisë, prioritet do të kenë edhe investimet që çojnë në mirëmenaxhimin e kompanisë.
“Së dyti, investimet do të drejtohen në miradministrim dhe uljen e humbjeve që do të thotë investimet e ardhshme do të fokusohen në sistemet e matjes, në sistemet e menaxhimit të flukseve të energjisë në mënyrë që të administrohen më mirë të ardhurat nga Operatori i Shpërndarjes së Energjisë Elektrike dhe që do të bëjnë të mundur në të ardhmen edhe fillimin e hapave të parë të liberalizimit të tregut të energjisë elektrike”, tha Gjiknuri.
Investimi prej 458 milionë lekësh për nënstacionin në Gjirin e Lalzit pritet të përfundojë në fillim të vitit të ardhshëm. Ai është vetëm një nga projektet me vlerë 1.5 miliard lekë që janë investuar për infrastrukturën energjetike nga Gjiri i Lalzit deri në Golem.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.