Kërkesa për kredi, rritje e ngadaltë – Bankat morën 50 mijë aplikime në gjysmën e parë të vitit
Kërkesa për kredi bankare po rritet me ritme ende mjaft të ngadalta. Banka e Shqipërisë raporton se për gjashtëmujorin e parë të këtij viti, bankat tregtare morën gjithsej pak më shumë se 50 mijë aplikime për kredi, në rritje me 2% krahasuar me gjysmën e dytë të vitit të kaluar. Po ta bëjmë krahasimin me të njëjtën periudhë të një viti më parë, numri i aplikimeve madje ka rënë lehtë, me 0.4%. Bankat tregtare raportojnë çdo 6-mujor informacion pranë Bankës së Shqipërisë lidhur me numrin total të aplikimeve për kredi të marra, duke i klasifikuar në aplikime të pranuara, të refuzuara dhe në shqyrtim. Përpunimi i këtij informacioni synon të masë ecurinë e kërkesës dhe ofertës për kredi në tregun bankar.
Për sa i takon qasjes së bankave ndaj kreditimit, në pamje të parë duket se ato janë shfaqur më të shtrënguara. Norma e refuzimit të aplikimeve në gjysmën e parë të këtij viti u rrit në 14%, nga 11% që kishte qenë në 6-mujorin e dytë të vitit të kaluar. Rritja e normës së refuzimit gjatë periudhës, ka ardhur sidomos në segmentin e individëve, ndërsa për bizneset kjo normë është ulur ndjeshëm. Sidoqoftë, fakti që mbi 80% e aplikimeve miratohen tregon se shtrëngimi i kredisë bankare nuk duket të jetë në përmasat e perceptimit të krijuar vitet e fundit.
Të dhënat e zbërthyera tregojnë se luhatjet e shkallës së refuzimit mes bankave dhe grupeve të klientëve janë të konsiderueshme. Për bankat vendase, norma e refuzimit të kredisë është ndjeshëm më e ulët krahasuar me bankat e huaja, për të gjitha kategoritë e klientëve. Sipas shifrave të fundit, bankat shqiptare kanë refuzuar vetëm 7% të aplikimeve për kredi, ndërsa bankat e huaja kanë refuzuar një pjesë shumë më të lartë, me 18.7%.
Një faktor që ka shumë ndikim është edhe përmasa e bankës ku aplikohet për kredi. Bankat e vogla, me më pak se 2% pjesë tregu, kanë një shkallë shumë të lartë të refuzimit të aplikimeve, që arriti në 31.5% vitin e kaluar. Ndërkohë, për katër bankat më të mëdha të sistemit, norma e refuzimit është ndjeshëm më e ulët, me 12.1%.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.