Kërkimi i naftës në Bllokun 4/Qeveria nënshkruan marrëveshje me SHELL – Rama: Impakt të madh në ekonomi
Qeveria shqiptare ka nënshkruar një kontratë të re me kompaninë e njohur SHELL për një tjetër investim në Shqipëri. SHELL do të nis kërkimin edhe në Bllokun 4 në Shpirag dhe do të vazhdojë programin e zbulimit të naftës, duke u bazuar edhe në pritshmëritë e larta që janë krijuar nga kërkimet e deritanishme në Blloqet 2 dhe 3. Marrëveshja u nënshkrua nga ministri i Energjisë dhe Infrastrukturës Damian Gjiknuri dhe menaxheri i përgjithshëm për SHELL-in në Shqipëri.
Ky investim do të ketë një impakt të madh në ekonominë shqiptare, deklaroi kryeministri Rama në fjalën e tij.
“Marrëveshja me SHELL konkretizon një interes më shumë se 20 vjeçar, që kur SHELL u shfaq në vendin tonë në 1994, ku u largua tre vite më pas nga trazirat. Sot ne jemi të gëzuar dhe shpresë plotë për të ardhme e sektorit të naftës dhe gazit në vendin tonë. Kjo ishte një negociatë shumë e gjatë, më shumë se dy vjeçare. Nga ky investim jo vetëm garantohen përfitime reciproke, por edhe sigurohet gjenerimi qysh që në vitet e para i qindra vendeve të punës. Ndërkohë që tërësia e projektit vlerësohet të ketë një impakt me rëndësi të jashtëzakonshëm në ekonominë shqiptare.
Investimi i SHELL do përmirësojë edhe jetën e banorëve në këtë zonë. Plani i investimeve sociale të SHELL parasheh, investime në arsimin profesional, sigurinë, infrastrukturën, mbështetje në bizneset e vogla etj”.
Rama shtoi se marrëveshja me SHELL është edhe një tregues garancie edhe për investitorët e tjerë të huaj.
“Me këtë marrëveshje ne i hapin rrugë një investimi të rëndësishëm të huaj në vendin tonë
Shqipëria sot garanton qartësi, transparencë dhe drejtësi në marrëdhëniet mes qeverisë dhe investitorëve të huaj. Dhe nga ana tjetër prania e SHELL përbën një arsye më shumë për të parë Shqipërinë, jo si përshkruhet në mediat e ndryshme në Evropë, por si një vend që përderisa investon SHELL-i mund të investojë kushdo, dhe këtë atmosferë investimi mund ta gjejë kushdo.
Çdo investitor i huaj mund ta shikoj Shqipërinë si një vend oportunitetesh të shumta. Sidomos në sektorin e hidrokarbureve, ka shumë për të zbuluar”.
Këtë vit bëhen 100 vjet nga zbulimi i parë i rezervave të para të naftës, në Drashovicë, në vitin 1918, nga kërkuesit italianë.
E.Z/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.