Këshilli i Europës, për korrupsionin në Shqipëri: Nuk zbatohet kodi i etikës, ministrat dhe Kryeministri të bëjnë transparencë me dhuratat dhe lobimet

Greco, Grupi i shteteve kundër korrupsionit të këshillit Të europës ka publikuar  raundin e pestë të vlerësimit  të Parandalimit të korrupsionit dhe promovimit të integritetit në pushtetin qendror (funksione të larta ekzekutivi) dhe në agjencitë ligjzbatuese për Shqipërinë. “Strategjia Ndërsektorale kundër Korrupsionit dhe Plani i Veprimit për zbatimin e tij parashikojnë miratimin dhe zbatimin e një Plani Integriteti nga çdo ministri.

Sidoqoftë, këto plane nuk janë hartuar ende. GRECO bën thirrje për miratimin e tyre të shpejtë dhe për marrjen parasysh të rreziqeve specifike të integritetit me të cilat mund të përballen ministrat dhe këshilltarët e tyre politikë gjatë ushtrimit të detyrave të tyre”-thuhet në raport. Këshilli i Europës nëpërmjet GRECO-s jep edhe një sërë rekomandimesh që duhen zbatuar në kuadër të luftës kundër korrupsionit.

“Për qëllim transparence, emrat e këshilltarëve politikë të publikohen në internet dhe që informacioni për punën e tyre kryesore dhe aktivitetet ndihmëse të gjendet lehtësisht në internet”-rekomandon GRECO.

“Një Kod Etik Ministror u miratua në vitin 2013, por GRECO dyshon nëse zbatohet në praktikë dhe nëse është funksional Komisioni i Etikës që parashikohet në Kod”-vijon më tej raporti. “Kodi Etik Ministror ekzistues të plotësohet me udhëzime konkrete për zbatimin e tij në lidhje me konfliktin e interesit dhe çështje të tjera të lidhura me integritetin (p.sh. dhuratat, kontaktet e palëve të treta, lobimet etj); të sigurohet funksionimi efektiv i Komisionit të Etikës, ose ndonjë mekanizëm tjetër i besueshëm i mbikëqyrjes dhe sanksioneve, sidomos në lidhje me Kryeministrin”-vijojnë rekomandimet. “Kodi parashikon një Komision të Etikës që do të krijohet me urdhër të Kryeministrit. Megjithatë, GRECO nuk ka mundur të vlerësojë as këtë Urdhër, as përbërjen e Komisionit dhe mënyrën e emërimit të tij”-thuhet mes reshtave.

Edhe çështja e lobimit merr fokusin e raportit. “Të përcaktohen rregulla të hollësishme se si personat me funksione të larta ekzekutive vendosin kontakte me lobistë dhe palë të tjera të treta që kërkojnë të ndikojnë në legjislacionin e shtetit dhe aktivitete të tjera dhe që ii) të sigurohet transparencë e mjaftueshme për qëllimin e këtyre kontakteve (zyrtare dhe jo zyrtare), identitetin e personit (personave) me të cilin (me të cilët) (ose në emër të të cilit/cilëve) janë vendosur kontaktet dhe çështjet specifike të diskutuara’’,rekomandon Këshilli i Europës në raport, duke shtuar gjithashtu se, legjislacioni shqiptar nuk rregullon kontaktet e PTEF-ve me lobistët dhe palët e tjera të treta që kërkojnë të ndikojnë në procesin e vendimmarrjes së qeverisë, dhe as nuk ka ndonjë nismë të njohur ligjore për të trajtuar këtë çështje, duke gjetur një perceptim mes përfaqësuesve të Qeverisë që nuk ka nevojë të rregullohen marrëdhëniet e anëtarëve të qeverisë me palët e treta.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.