KLSH zbardh 240 milionë dollarë evazion – Raporti për vitin 2021: Shifra më e madhe e dëmit e shkaktuar nga shkeljet e Kodit Doganor

24.2 miliardë lekë, apo rreth 240 milionë dollarë është vlera e evazionit në fushën e tatimeve dhe doganave e konstatuar nga Kontrolli i Lartë i Shtetit përgjatë vitit 2021. Në fushën e zbatimit të legjislacionit tatimor, KLSH konstaton një vlerë dëmi ekonomik prej 2,3 miliardë lekësh, së cilës i shtohet vlera prej 7,5miliardë lekësh, apo rreth75 milionë dollarësh efekte negative për shkak të parregullsive. Të dy zërat e çojnë në thuajse 100 milionë dollarë shumën e munguar në arkën e shtetit. Në fushën e zbatimit të Kodit Doganor, Kontrolli i Lartë i Shtetit konstaton një dëm ekonomik prej14,4 miliardë lekë, afërisht 140 milionë dollarë.

Ndërkohë që dëmi më i madh ekonomik i konstatuar nga Kontrolli i Lartë i Shtetit gjatë vitit të shkuar i përket shpenzimeve buxhetore, veçanërisht ato për investime publike. Për shkak të abuzimeve në investime, të ardhurat e munguara në buxhetin e shtetit vlerësohen nga KLSH në një total prej 25.2 miliardë lekësh, apo rreth 250 milionë dollarë. 2.4 miliardë lekë, apo rreth 24 milionë dollarë efekte negative në arkën e shtetit, janë konstatuar me shpenzimet që lidhen me pagat e shpërblimet e administrates publike, ndërkohë që nuk mbeten pas as dëmet ekonomike në fushën e shpenzimeve operative, ku totali arrin në 1.3 miliardë lekë, afërisht 13 milionë dollarë.

Sa i përket të dhënave në total, në 158 auditime të kryera gjatë vitit 2021 në 205 institucione, Kontrolli i Lartë i Shtetit ka konstatuar një dëm ekonomik dhe të ardhura të munguara në Buxhetin e Shtetit me vlerë rreth 740 milionë dollarë. Pjesa më e madhe e kësaj shume i takon efekteve negative të të ardhurave të munguara në buxhetin e shtetit, që prekin shumën totale prej 55.4 miliardë lekësh, afërsisht 550 milionë dollarë. Pjesa tjetër prej 19.1 miliardë lekësh, apo afërisht 190 milionë dollarë është konstatuar në formën e pastër të demit ekonomik.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.