Kontrollet doganore – Testohet teknologjia e re, i kursen kohë doganierëve dhe siguron rezultate më të shpejta
Sfida kryesore për punonjësit e doganave është gjetja e armëve, drogave dhe produkteve të rrezikshme të fshehura në mesin e miliona kontejnerëve që kalojnë kufijtë çdo ditë. Në portin tregtar të Gdanskut, studiuesit po testojnë një teknologji që do të mundësojë inspektime më të sakta dhe për më tepër më të shpejta.
Rreth tre milionë kontejnerë kontrollohen çdo vit në Terminalin e Kontejnerëve Deepwater në Gdansk, Poloni. Kjo është një sfidë e madhe logjistike për doganierët që drejtojnë kontrolle të rastësishme për të zbuluar mallra ilegale dhe të rrezikshme.
Një ndihmë të madhe në zbulimin e lëndëve të rrezikshme gjatë kalimit të kufirit do të japë teknologjia C-Bord, e cila është testuar në Poloni. Materialet e tilla si cigaret, droga dhe armët shpesh fshihen në kontejnerë modestë për të krijuar një skenar realist.
Sipas Euronews, ky projekt i financuar nga Bashkimi Europian përfaqëson gjeneratën e ardhshme të pajisjeve të inspektimit të ngarkesave, e cila do t’u kursejë më shumë kohë oficerëve.
Inspektimi fillon me futjen e një sonde në kontejnerë, e cila thith ajrin brenda dhe dërgon grimcat në një mini-laborator që i zbulon ato në kohë reale. Më pas kryhet procesi i rrezatimit, një procedurë e cila mund të bëhet në disa mënyra, varësisht nga madhësia e ngarkesës. Projekti C-Board ka përmirësuar aftësinë aktuale të zbulimit të rrezeve X që mundëson një zbulim të menjëhershme gjatë skanimit të ngarkesës.
Kështu, në fund të inspektimit, rezultatet e pajisjeve të ndryshme mblidhen në një vend të përbashkët, ku mund të shihen më pas nga doganierët. Kjo teknologji siguron rezultate më të shpejta dhe një fleksibilitet më të madh në aspektin e përdorimit.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.