Kredia e re – Mesatarisht, 21.7 miliardë lekë në muaj
Sistemi bankar ka dhënë më shumë kredi gjatë vitit të kaluar. Megjithëse përtëritja e kreditimit të ekonomisë është ende e brishtë, statistikat tregojnë se kredia e re është në përmirësim të ndjeshëm. Për 11 mujorin e vitit 2017, sistemi bankar disbursoi mbi 238 miliardë lekë kredi të re, në rritje me 13% ndaj të njëjtës periudhë të vitit të mëparshëm.
Për 11 muajt e vitit 2017, sasia mesatare mujore e kredisë së re arriti në 21.7 miliardë lekë, nga 19.1 miliardë lekë që ishte kredidhënia mesatare për 11-mujorin 2016. Ndonëse në terma të tepricës së kredisë përmirësimi ende nuk është shumë i ndjeshëm, kjo ndodh edhe për shkak të faktit se huaja e dhënë nga sistemi bankar shqiptar ka në pjesën më të madhe maturitet afatshkurtër dhe kërkon rinovim relativisht të shpeshtë në kohë.
Kredia e re është rritur si te bizneset, ashtu edhe te individët, çka tregon se ka një tendencë pozitive për përmirësim të kreditimit të ekonomisë. Sistemi bankar vitin e kaluar ka dhënë çdo muaj mesatarisht 35 milionë euro kredi për individët dhe rreth 128 milionë euro kredi për bizneset.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.