Krijohet Agjencia për Dialog dhe Bashkëqeverisje – ‘Instrumenti’ që garanton përgjegjshmërinë e institucioneve ndaj qytetarëve

Në mbledhjen e Këshillit të Ministrave është vendosur të krijohet Agjencia për Dialog dhe Bashkëqeverisje.

Kjo agjenci do të jetë në varësi të Kryeministrit dhe ka për qëllim të ofrojë shërbime publike në mënyrë direkte, përmes platformës elektronike “Me ty, për Shqipërinë që duam”.

Nëpërmjet saj qytetarët kanë mundësi të marrin trajtimin e apo përgjigjen në kohën e duhur lidhur me kërkesat, nismat apo ankesat e dërguara në ministritë e linjës apo institucionet e varësisë.

Kështu, të gjitha nismat me interes publik të ardhura nga qytetarët apo iniciativa të organizatave jofitimprurëse dhe sipërmarrjeve të cilat kërkojnë mbështetje do të trajtohen nga kjo agjenci në bashkëpunim me ministritë e linjës dhe institucionet e varësisë.

Po ashtu, Agjencia për Dialog dhe Bashkëqeverisje do të organizojë edhe të gjitha kërkesat për interpelancë drejtuar Kryeministrit, Zv.kryeminstrit, ministrave specifike apo një grupi prej tyre.

Kjo agjenci realizon dhe financon projekte inovative të studentëve, studiuesve, artistëve, kuratorëve, gazetarëve dhe aktivistëve të shoqërisë civile, për sigurimin e mjeteve e të mundësive për ndikimin e politikave publike dhe krijimin e një dialogu të gjerë, që siguron institucione të hapura, transparente e më pranë qytetarëve.

Agjencia për Dialog dhe Bashkëqeverisje është një institucion buxhetor i cili do të financohet nga buxheti i shtetit dhe burime të tjera të ligjshme.

Kështu, me krijimin e kësaj agjencie, nëpunësit ekzistues të strukturës aktuale të Agjencisë së Menaxhimit të Qendrave për Hapje dhe Dialog (AMQHD), transferohen pranë Agjencisë për Dialog dhe Bashkëqeverisje.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.