Kryeministri zbulon strategjinë e hapjes graduale: “Në Bashkitë ku ka përhapje të ulët, do ketë më shumë liri”
Kryeministri Edi Rama në komunikimin me qytetarët në rrjete sociale ka njoftuar strategjinë që do të ndjekë Shqipëria për fazën graduale të hapjes në krizën e koronavirusit.
Kryeministri tha se masat e reja që do të shpallen në javën e ardhshme nuk do të jenë të njëjta për të gjitha bashkitë e vendit duke nënvizuar se, në disa prej tyre do të ketë orar më të zgjatur për daljet për të bërë pazar si dhe për lëvizje në këmbë brenda bashkisë. “Prej javës së ardhme në bazë të hartës së epidemisë dhe propozimit të Ministres së Shëndetësisë do të pilotojnë në disa zona me risk të ulët një lehtësim më të madh të masave se sa në pjesën tjetër të vendit”, deklaroi kreu i qeverisë.
Si shembull për zonat me risk të ulët të përhapjes së COVID-19 kryeministri përmendi Gjirokastrën dhe Dibrën ku deri tani virusi është përhapur në nivele minimale. Nga ana tjetër në zona me risk të lartë përmendi Krujën, Tiranën dhe Durrësin, ku tolerimet do të jenë të pakta.
Nga ana tjetër drejtuesi i qeverisë paralajmëroi se kushdo që do të hapë biznesin në shkelje me rregullat e protokollit të sigurisë do të ndëshkohet. Duke iu referuar ndryshimeve më të fundit në Kodin Penal, që u dekretua dhe nga Presidenti, Rama tha se tani shkelësit përveç gjobës përfundojnë dhe në burg. Për të ushtruar kontroll në territor pritet të ngrihet dhe një Task-Forcë.
“Sot një person jo vetëm gjobitet por vendoset dhe pas hekurave kur thyen masat dhe rrezikon jetën e njerëzve. Sot nuk shkohet më në punë vetëm për të hapur dyqanin dhe bëjnë lekë. Por dhe për të mbrojtur shëndetin e punonjësve dhe blerësve. Për shembull, një biznes fason nuk ia hedhin dot më me një gjobë dhe mbyllje aktiviteti për përhapje me ose pa dashje të epidemisë me pasojë vdekjen e njerëzve. Mos i hapni dyert apo qepenat pa marrë në portalin e urryer e-Albania. protokollin përkatës të sigurisë shëndetësore për llojin e bizneset tuaj”, përfundoi z. Rama.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.