Kuvendi nis nga puna në 100 vjetorin e themelimit. Votohet kryetari i Komisionit të Ekonomisë dhe Inspektoriatit të Lartë të Drejtësisë
Kuvendi ka nisur në ditën e sotme seancën e saj të parë konstituive pas pushimeve të sezonit. Ky vit përkon gjithashtu edhe me 100 vjetorin e veprimtarisë së këtij institucioni.
Seanca ka nisur me me fjalën e kreut të këtij institucioni Gramoz Ruçi. Teksa përmendi ngjarjen e rëndë të tërmeti të 26 nëntorit, Ruçi falenderoi palët politike për sjelljen e treguar për përballimin e kësaj situate, duke u shprehur se këtë vit një sërë reformash dhe çështjesh të mëdha e presin Shqipërinë, nga ajo Zgjedhore deri tek Integrimi në Bashkimin Europian.
Ai prezantoi edhe një investim të Kuvendit, për votimin elektronik i cili, tha ai, do të rrisë aksesin e deputetëve në zhvillimet e Kuvendit.
Ndërkohë, në Kuvend është votuar nga deputetët socialistë për kryetaren e re të Komisionit të Ekonomisë, znj.Ilva Ekonomi, e cila zëvendëson Arben Ahmetaj, tashmë ministër i shtetit për Rindërtimin.
Një tjetër votim i rëndësishëm ndërmarrë nga Kuvendi është edhe përzgjedhja e kryetarit të ri të Inspektoriatit të Lartë të Drejtësisë, një institucion i ri themeluar nga Reforma në Drejtësi, ku u zgjodh Artur Metani me 98 vota pro. Pas votimit, Metani është betuar në foltoren e Kuvendit, përpara deputetëve.
Ndërkohë, në axhendën e Kuvendit për këtë muaj është edhe paketa e njohur Anti-KÇK, që kryeministri ka premtuar se do të kalojë si ligj brenda janarit, por edhe miratimi i ligjit Anti-Shpifje pas kthimit me dekret nga presidenti Ilir Meta.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.