Llalla, zyrtarisht i pandehur – SPAK: Fshehje e deklarim i rremë i pasurisë në tre raste. Dosja niset në Gjykatën e Posaçme

SPAK ka mbyllur hetimet për ish-Kryeprokurorin e Përgjithshëm Adriatik Llalla duke e vënë nën akuzë për fshehje të pasurisë në tre raste. Përmes një njoftimi zyrtar, Prokuroria e Posaçme Antikorrupsion ka bërë me dije se në përfundim të hetimeve paraprake, pasi janë kryer të gjitha veprimet e mundshme dhe të nevojshme hetimore, pasi janë vlerësuar të gjitha provat e administruara gjatë hetimeve, shtetasi Adriatik Llalla është marrë i pandehur dhe i është njoftuar akuza për kryerjen e veprës penale : “Refuzimi për deklarimin, mosdeklarimi, fshehja ose deklarimi i rremë i pasurive, interesave private të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”, të kryer tre herë, të parashikuar nga neni 257/a, paragrafi (2) i Kodit Penal.

Hetimet ndaj ish kreut të Prokurorisë së Përgjithshme, tanimë i pandehur, nisën dy vite më parë. Ai u hetua, për të paktën katër vepra penale, që nga mosdeklarimi i pasurisë, te mosdeklarimi i të hollave në kufi, shpërdorimi i detyrës dhe pastrimi i parave.

Aktualisht, nga Prokuroria e Posaçme janë duke u kryer veprimet administrative për dërgimin e akteve të procedimit penal Nr.65/2019, për gjykim në Gjykatën e Posaçme të Shkallës së Parë për Korrupsionin dhe Krimin e Organizuar Tiranë.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.