Llogaritë offshore në “shënjestër” – Pr/ligji, parandalim mashtrimit fiskal
Ministria e Financave dhe Ekonomisë po ndërmerr disa iniciativa ligjore për të kontrolluar dhe parandaluar evazionin fiskal. Së fundmi ky institucion ka hartuar dhe hedhur për konsultim, projektligjin “Për shkëmbimin automatik të informacionit të llogarive financiare”, me shtetet e tjera. Referuar relacionit shpjegues, sipas standardit të ri global, një gamë e gjerë e informacionit do të shkëmbehet mbi llogaritë offshore, duke përfshirë bilancet e llogarive dhe të pronësisë.
Kjo do të bëjë të mundur parandalimin e evazionit fiskal dhe trajtimin e mashtrimit fiskal. Me argumentin s veprimtaria e evazorëve jo vetëm zvogëlon të ardhurat publike, por dhe dobëson besimin në drejtësinë e sistemit tatimor, si dhe rrit barrën mbi tatimpaguesit e ndershëm. Ky projektligj vjen në kuadër të Forumit Global mbi Transparencën dhe Shkëmbimin e Informacionit për Qëllime Tatimore, ku Shqipëria është pjesë prej Muajit Nëntor të vitit 2012.
Po në këtë kuadër, Ministria e Financave po punon për hartimin e një ligji të ri, që synon të krijojë një regjistër i cili do të zbardhë emrat e pronarëve përfitues të kompanive të regjistruara në parajsat fiskale (offshore) me aktivitet në Shqipëri, në linjë dhe me rekomandimet e raportit të fundit të Moneyval, mekanizmi i Komisionit Europian, që bën vlerësimin për masat kundër pastrimit të parave dhe financimit të terrorizmit.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.