Shuli në ‘Argument’: Skavica do na kursejë 50 milion euro në vit nga importi i energjisë
Të ftuar në studion e ‘Argument‘ për të folur mbi ndërtimin e Hec Skavicës, ishin Mariglen Shuli nga Korporata Energjetike Shqiptare, Lorenc Gordani nga Tirana Business University College dhe Kreshnik Kuçaj, autor i “Dosja E”, i cili ka folur për historinë e hidrocentralit të Skavicës.
Lorenc Gordani ka folur mbi rëndësinë e madhe të hidrocentralit të Skavicës, pasi ky hidrocentral ka potencial për ta bërë KESH një korporatë të rëndësishme rajonale dhe konkurruese në bursat rajonale. Nga pikëpamja ekonomike, Gordani ka thënë që ky projekt do të rriste financat e qeverisë në të ardhmen pasi e bën KESH një kompani me mundësi konkurrimi në rajon që mund të ndikojë në çmimin e energjisë nëpërmjet prodhimit të tepërt dhe eksportimit të energjisë.
Shuli ka treguar mbi projektin e HEC, ku janë paraqitur dy alternativa: Në alternativën e parë diga e HEC Skavicës do të jetë mbi 300 metër me fuqi 92 mega vat, ndërsa në variantin e dytë, diga do të jetë më e lartë, mbi 400 metra, me fuqi 210 mega vat.
Më tej, Z.Shuli është shprehur se Skavica do të rrisë kapacitetet e të gjithë Kaskadës së Drinit, duke theksuar se kjo rritje do t’i kursente shtetit shqiptar 50 milionë euro në vit, duke qenë se do të shkurtonte nevojën për import energjitik me 50%.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.