Ministria e Jashtme jep njoftimin për Slloveninë – Heqja e kufizimeve nuk prek shtetasit shqiptarë që do të udhëtojnë drejt saj

Ministria për Evropën dhe Punët e Jashtme nëpërmjet një njoftimi ka bërë me dije se Sllovenia ka prezantuar regjimin e ri të kalimit nëpërmjet kufijve të saj, sipas të cilit nuk ka lehtësime për shtetasit shqiptarë dhe shtetasit e tjerë të vendeve të treta që lëvizin drejt vendit të tyre përmes Sllovenisë.

Referuar njoftimit, shtetasit e vendeve të BE-së mund të hyjnë në territorin slloven nga Austria, Italia dhe Hungaria, nëse nuk janë infektuar apo paraqesin simptoma të Covid-19 dhe gjithashtu nuk i nënshtrohen karantinës dy javore. Shtetasit e vendeve të treta, ku përfshihen edhe ata shqiptarë, që hyjnë në Slloveni për arsye të përcaktuara, por jo që të udhëtojnë drejt Shqipërisë, kanë detyrimin e karantinës dy javore.

Shtetasit shqiptarë që udhëtojnë drejt Shqipërisë duke hyrë në territorin slloven nga Austria, Italia dhe Hungaria, iu ndalohet të hyjnë në Slloveni, nëse më parë nuk u është dhënë leje e konfirmuar nga shteti kufitar drejt të cilit ata udhëtojnë, ka njoftuar Ministria.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.