Ministrja Denaj në Kroaci: “Presim investimet strategjike dhe bashkëpunim”, kroatët mbështesin integrimin e Shqipërisë në BE

Ministrja e Ekonomisë dhe Financave, Anila Denaj ka kryer një vizitë zyrtare në Kroaci ku u prit nga Zv. Kryeministri dhe Ministri i Financave, z. Zdravko Marić, Ministri i Ekonomisë, Sipërmarrjes dhe Zejtarisë, z. Darko Horvat, dhe nga Ministri i Turizmit, z. Gari Cappelli.

Fokusi kryesor i kësaj vizite ishte intensifikimi i marrëdhënieve tregtare mes dy vendeve dhe garancia e mbështetjes kroate për perspektivën europiane të Shqipërisë drejt anëtarësimit të plotë në Bashkimin Europian.

Kroacia do të mbajë presidencën e BE-së përgjatë vitit 2020 dhe pritet të luajë një rol të madh në samitin e Zagrebit, në muajin maj ku do të diskutohet edhe hapja e anëtarësimeve me Shqipërinë dhe Maqedoninë e Veriut.

Ministrja u shpreh e gatshme për mirëpritjen e investimeve kroate në sektorë strategjikë dhe mirëpriti ndihmën teknike që Kroacia mund të dhurojë për përthithjen e investimeve të Shqipërisë nga BE-ja:

“Gatishmëria dhe angazhimi ynë do të jetë i lartë për të mirëpritur investimet dhe projektet kroate në sektorët strategjikë. Do të mirëpresim më kënaqësi edhe çdo mbështetje institucionale në kuadër të bisedimeve teknike me Komisionin Evropian dhe ato politike me strukturat e BE-së në tërësi”, theksoi Ministrja Denaj gjatë kësaj vizite.

Nga krahu tjetër, ministri i Ekonomisë, Horvat është betuar për hapjen e një linje direkte ajrore mes Zagrebit dhe Tiranës dhe bashkëpunim konkret në fushat si turizëm, transport detar dhe zejtari.

Gjatë vizitës në Kroaci, Ministrja Denaj mori pjesë edhe në Forumin e Përbashkët të biznesit organizuar nga dy Dhomat Kombëtare të Tregtisë se dy vendeve, ku theksoi se kjo është një mundësi shumë e mirë për një intensifikim të marrëdhënieve mes investitorëve shqiptarë dhe kroatë, si dhe për të prezantuar Shqipërinë në një audiencë më të gjerë.

Sipas Ministres, Diaspora shqiptare në Kroaci ofron gjithashtu një avantazh i cili mund të materializohet së shpejti edhe në kuadrin ekonomik.

Ministrja Denaj u shprehu kolegëve kroatë falënderimet në emër të Qeverisë shqiptare për ndihmën dhe kontributet e dhëna nga Qeveria kroate në përballimin e pasojave të tërmetit të 26 Nëntorit 2019.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.