Ministrja Denaj publikon të dhënat: “Rimbursimi i TVSH-së prioritet i qeverisë. Viti 2019 shënon shifër rekord”
Ministrja e Financave dhe Ekonomisë, Anila Denaj ka publikuar të dhënat në ditën e sotme sa i përket rimbursimit të TVSH-së tek bizneset.
Me bashkëpunimin e Administratës Tatimore, ministria bën të ditur se viti 2019 ka shënuar një rezultat të lartë sa i përket zbatimit të kësaj mase.
“Në fund të vitit 2019, stoku i TVSH-së ka qenë zero për të gjithë tatimpaguesit me metodën FIFO, duke rimbursuar 23.5 Miliard lekë, shumë më e madhe se çdo vit tjetër.” – njofton ajo.
396 biznese janë rimbursuar në periudhën mars-maj me një vlerë prej 5.9 miliardë lekësh sipas ministrisë, duke treguar se ky mbetet një prioritet i qeverisë edhe në kohë krize.
Gjithashtu ministrja ka bërë edhe një lajmërim sa i përket kësaj mase duke u shprehur se administrata tatimore ka bërë një rishikim të rregullores së përcaktuar, e cila sipas saj plotëson dy kushte kryesore si nevojën për likuiditete të bizneseve dhe reduktimin e kohës për procesimin e kërkesave për rimbursim.
G.K / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.