‘Miratoni statusin e minatorit’, nis nënshkrimi i peticionit: “Rritje pagash, pensionesh dhe ndryshim i moshës së pensonit”

Minatorët dhe ish-minatorët kanë nisur nënshkrimin e një peticioni, drejtuar Kuvendit dhe qeverisë, ku kërkojnë miratimin e “Statusit të minatorit”, që pavarësisht premtimeve ndër vite, ka mbetur ende në letër. Nisma është ndërmarrë nga Sindikata e Minatorëve të Bashkuar të Bulqizës, ndërsa liston përfitimet që duhet të ketë kjo kategori, duke qenë se kuadri ligjor në fuqi nuk u përgjigjet nevojave bazike të tyre. Peticioni përmban 4 pika, ku e para është sigurimi i jetës për minatorët. Më konkretisht kërkohet dëmshpërblimi i familjarëve me 6 mln lekë në rast aksidentesh me pasojë vdekjen në vendime punës, pension familjar në masën 100% të pagës dhe bursa studimi universitare për fëmijët.  Dëmshpërblime kërkohen edhe në raste aksidentesh me pasojë pamundësinë për punë apo kur është i mundur rikthimi në punë.

Pika e dytë përfshin ndër të tjera, rritjen e pagës dhe përfitimeve të tjera, duke theksuar se paga e një minatori nuk duhet të jetë më e ulët se 235% e pagës minimale zyrtare, pagesë për vështirësi në punë si dhe përfitimin e pagës së 13-të. Pika e tretë e peticionit këkon rritjen e pensioneve për minatorët, duke theksuar se pensioni minimal nuk duhet të jetë më i ulët se 135% e pagës minimale zyrtare. Gjithashtu, kërkohet ndryshimi i moshës së daljes në pension, ku për ata që kanë 11 vite nëntokë të jetë 53 vjeç, për ata që kanë 10.5 vite, 54 vjeç dhe për ata që kanë 10 vite mosha e daljes në pension të jetë 55 vjeç. Ndërkaq, pika e 4-t e peticionit trajton, garantimin e kujdesit shëndetësor të veçantë, duke përfshirë barna 100% të rimbursueshme. Sipas Sindikatës, “Statusi i Minatorit” është nevojë urgjente për dhjetëra mijëra minatorë, që punojnë aktualisht apo janë në pension, duke theksuar se miratimi i tij do t’i jepte punës në minierë dinjitetin që i është mohuar prej kohësh.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.