Monitorimi i burgjeve – Vodo: Do të kufizojë komunikimet e jashtme, ja masat e reja për të dënuarit për terrorizëm
Shtimi i sigurisë në burgje nuk është një nismë e re, por një vazhdimësi e masave të ndërmarra nga Ministria e Drejtësisë në ruajtjen e sigurisë publike. Kështu është shprehur zëvendësministrja e Drejtësisë, Teuta Vodo, në një intervistë për TV SCAN lidhur me vendimin e fundit të qeverisë për ngritjen e një salle operative monitorimi non stop me kamera të burgjeve.
Sipas Vodos, ngritja e kësaj salle operative është ‘frymëzuar’ nga një model italian dhe synon të kufizojë komunikimet e jashtme të burgosurve dhe të paraburgosurve që paraqesin rrezikshmëri të lartë. Po
“Për sa i përket këtij vendimi, bëhet fjalë për një sallë operative që do të jetë e qendërzuar cila do të monitorojë të gjitha burgjet e tjera. Do fillojë nga burgjet me siguri të lartë dhe më pas do të shtrihet në 24 institucionet e tjera. Qëllimi kryesor është që të mund të kufizojë të gjitha komunikimet e jashtme që të burgosurit dhe të paraburgosurit me një rrezikshmëri të lartë kanë ndaj publikut”, u shpreh Vodo.
Ndërkohë, sa i takon ndryshimeve ligjore për të dyshuarit apo për të dënuarit të përfshirë në krim të organizuar apo organizata terroriste, sipas zv. ministres jo vetëm do të përballen me kufizime telefonatash, por do të bëhet gjithashtu edhe monitorimi i tyre.
“Kjo risi parashikon numër të kufizuar telefonatash me komunikime të jashtme. Për të tilla kategori do ketë masa të kufizuara, një telefonatë në muaj ose asnjë, një kohëzgjatje prej 10 minuta maksimumi si dhe do të monitorohet”, tha zv. ministrja Vodo.
E pyetur me situatën aktuale në burgje, zv. ministrja është shprehur se hapja e burgut të Reçit ka krijuar lehtësira për burgjet e tjera të vendit.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.