Nga zerimi i barrierave tregtare, tek heqja e roaming – Ja marrëveshjet që do të zbatohen mes Shqipërisë dhe Kosovës
Në mbledhjen e përbashkët mes dy qeverive të përbashkëta, të Kosovës dhe Shqipërisë në Pejë janë prezantuar një sërë vendimesh dhe marrëveshjesh që pritet të vihen ne zbatim në 6-mujorin e viti të ardhshëm.
Sa i takon shkëmbimeve tregtare, në 6 mujorin e parë të 2019, do të ketë zero barriera tarifore mes dy vendeve, u shpreh Rama në fjalën e tij.
Më tej, një tjetër marrëveshje që pritet të zbatohet gjatë kësaj periudhe është edhe bashkimi doganor me Shqipërisë dhe Kosovës. Ndërkohë, do të bëhet gjithashtu edhe njohja e plotë e të gjitha dokumenteve, ku do të ketë vetëm një palë të tilla për secilin vend.
“Njohje të plotë të të gjithë dokumentave brenda 6 mujorit. 1 palë dokumenta dhe brenda 6 mujorit të 2019, çfarë jepet në Kosove si dokument duhet të konsiderohet dokument i nxjerrë në Shqipëri dhe e anasjelltas”, u shpreh Rama.
Marrëveshja për njohjen e ndërsjellë të patentave po ashtu ishte një tjetër çështje që u diskutua gjatë mbledhjes së qeverive. Ndërkohë, të dy vendet po ashtu pritet të shkojnë drejt unifikimit doganor.
“Tranzit në 1 janar në Portin e Durrësit për Kosovën dhe hapa të tjerë brenda 6 mujorit të ardhshëm drejt bashkimit doganor. Kush e konsideron këtë si kërcënim, qoftë në Beograd, qoftë në Bruksel, është i mirëpritur të vijë, të ulet në tavolinë, t’i shpjegojmë që nuk është kërcënim, por është një ftesë që të gjithë të tjerët të marrin shembull nga ky bashkëpunim dhe Serbia e para të ndjekë shembullin e këtij bashkëpunimi”, deklaroi Rama.
Ndërkohë, sa i takon heqjes së roaming, Rama tha se brenda 6-mujorit të parë të 2019, nuk do të ketë më roaming mes Kosovës dhe Shqipërisë.
Po ashtu, do të bëhet lehtësimi total për kalimin e mallrave dhe njerëzve me unifikimin e pikës kufitare të Morinës. Sipas Ramës, janë ministritë e Brendshme të dy vendeve ata që duhet të merren konkretisht me këtë çështje, që të funksionojë si ‘ një kufi pa kufi.’
Më tej, kryeministri Rama ka ftuar homologun e tij kosovar, që të bashkohet me iniciativën për vendosjen e një fondit për dy Ministritë e Jashtme të vendit për krijimin e një dokumenti të përbashkët për dy vendet.
“Unë ftoj kryeministrin Haradinaj që të bashkohet me nevojën që të vendosim një fond për dy ministritë e Jashtme dhe dy ministritë e jashtme të fillojnë punën me konsulencë ndërkombëtare për të bërë një dokument analitik dhe strategjik ‘Shqipëria, Kosova dhe rruga e bashkimit të shqiptarëve në horizontin e vitit 2025. Një dokument demografik, ekonomik, social, i sistemeve politike dhe të gjtiha këto së bashku”, u shpreh Rama.
Sipas këtij të fundit, të gjitha këtë marrëveshje u japin një impuls shkëmbimeve tregtare, ndërsa shtoi më tej se janë gjithashtu edhe një mesazh për Serbinë.
Lista e plotë me marrëveshjet e nënshkruara nga dy qeveritë në Pejë:
1. Nënshkrimi i marrëveshjeve për heqjen e çmimeve për shërbimin roaming.
2. Nënshkrimi i protokollit për kryerjen e veprimeve të përbashkëta të kontrollit doganor në pikën kufitare Morinë-Vernicë.
3. Nënshkrimi i marrëveshjes për bashkëpunim në fushën e borxhit publik, financimeve të huaja dhe marrëdhënieve me institucionet financiare ndërkombëtare.
4.Memorandum mirëkuptimi ndërmjet Agjencisë për Pronësinë Industriale të Kosovës dhe Drejtorisë së Pronësisë Industriale të Shqipërisë.
5. Nënshkrimi i protokollit mes Ministrive të Bujqësisë për njohjen dypalëshe dhe unifikimin e modeleve të certifikatave shëndetësore, veterinare që shoqërojnë kafshët e gjalla dhe produktet me origjine shtazore.
6. Marrëveshje bashkëpunimi në fushën e rinisë.
7. Themelimi i Dhomës Ekonomike bilaterale Shqipëri – Kosovë.
8. Marrëveshje për njohjen reciproke të patentave për drejtuesit e mjeteve.
9. Marrëveshje bashkëpunimi në fushën e shëndetësisë.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.