“Ngërçi” në Bankën e Shqipërisë – Emrat e qeverisë për Këshillin: Ridvan Bode, Suela Popa dhe Edlira Luçi

Po shkon drejt zgjidhjes ngërçi i krijuar në Këshillin Mbikëqyrës së Bankës së Shqipërisë, pas mbarimit të mandatit të 6 anëtarëve të tij. Këshilli i Ministrave ka miratuar tre kandidaturat që do i propozojë Kuvendit, ndërkohë që referuar vendimit të së premtes emrat që do të orientojnë politikat monetare në vend janë Ridvan Bode, Suela Popa dhe Edlira Luçi.

Emri i Bodes në këtë listë mund të cilësohet një “surprizë”, duke qenë se ai ka mbajtur postin e ministrit të Financave në qeverinë Berisha si dhe ka qenë një nga emrat më të rëndësishëm në Partinë Demokratike.

Ndërkohë që, Suela Popa është bashkëshortja e deputetit të Lëvizjes Socialiste për Integrim, Vangjel Tavo e cila më herët ka drejtuar Agjencinë e Zhvillimit Bujqësor dhe Rural. Sa i takon kandidaturës së Edlira Luçit, ajo është lektore në Universitetin e Tiranës , ndërsa ka qenë pjesë e bordeve drejtuese të institucioneve të ndryshme financiare si: Agjencia e Sigurimit të Depozitave, Agjencia e Trajtimit të Kredive, etj.

Ndërkaq, mbeten për t’u zyrtarizuar dhe emrat e tre kandidatëve që do të propozohen nga Kuvendi, duke i hapur rrugën plotësimit të Këshillit. Tashmë në Komisionin e Ekonomisë janë prezantuar 15 kandidatë,  mes tyre profesorë ekonomie, drejtësie, ish-drejtues dikasteresh, një pjesë e të cilëve kanë qenë edhe më parë anëtarë të këtij këshilli.

Këshilli Mbikëqyrës përbëhet nga 9 anëtarë dhe është organi më i lartë vendimmarrës dhe mbikëqyrës i Bankës së Shqipërisë. Ai është përgjegjës për hartimin e politikës monetare dhe për miratimin e udhëzimeve për zbatimin e saj.

Gjithashtu, ai vendos mbi politikat e administrimit në përgjithësi, si dhe përcakton mënyrat ose procedurat për realizimin e veprimtarisë operative të Bankës së Shqipërisë. Aktualisht ai ka mbetur vetëm me 3 anëtarë, që janë Guvernatori Gent Sejko, zëvendësguvernatorja e Dytë, Natasha Ahmetaj dhe  Tonin Kola.

Në mbledhjen e fundit, të zhvilluar në datën 21 nëntor, 3 anëtarët nuk morën vendime, duke bërë që çështjet e planifikuara për vendimmarrje në mbledhjet e muajit nëntor do të duhet të trajtohen në mbledhjet e ardhshme, atëherë kur Këshilli Mbikëqyrës i Bankës së Shqipërisë të ketë numrin e nevojshëm për zhvillimin e mbledhjeve dhe marrjen e vendimeve përkatëse.

Kandidatët që kanë aplikuar në Kuvend:

1- Vjollca Braho

2- Bardhyl Ceku

3- Leontijev Çuçi

4- Sulo Hadëri

5- Artan Hoxha

6- Altin Hoti

7- Oljan Kanushi

8- Genc Koxhaj

9- Arben Malaj

10- Visar Malaj

11- Luljeta Minxhozi

12- Ergys Misha

13- Nikollaq Pano

14- Drini Salko

15- Arben Xibri

Ola Mitre/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.