Nis aksioni i çlirimit të ambienteve spitalore, Manastirliu: 1132 metra katrorë hapësirë e zënë
Aksioni për çlirimin e ambienteve spitalore nga aktiviteti jo spitalor dhe pastrimi i spitaleve ka nisur nga qyteti i Elbasanit. Ministrja e Shëndetësisë dhe Mbrojtjes Sociale tha se vetëm në spitalet rajonale janë 1132 metra katrorë hapësirë e zënë, e cila jo vetëm i zë frymën spitaleve, por lidhet edhe drejtpërdrejt me infeksionet spitalore.
“Jemi sot këtu në Elbasan, për të nisur aksionin e pastrimit të territoreve të spitaleve nga ngrehina e aktivitete që jo vetëm nuk kanë lidhje me to, por më keq akoma, rrisin ndotjen spitalore, e cila është e lidhur drejtpërdrejt me infeksionet spitalore. Faza e parë ka qenë ajo e identifikimit në çdo spital rajonal dhe bashkiak të të gjithë këtyre objekteve. Kemi identifikuar vetëm në spitalet rajonale rreth 1132 metra katrorë hapësirë të zënë, ndërtime gjithfarësh që i kanë zënë frymën spitaleve. Ne jemi të angazhuar për të ndryshuar faqen e spitaleve tona dhe për të ofruar një shërbim të denjë për qytetarët”, tha Manstirliu.
Manastirliu garantoi të gjithë qytetarët se kudo ku ata e marrin shërbimin shëndetësor, do të trajtohen në mjedise të pastra dhe dinjitoze.
“Angazhimi ynë është që brenda 100 ditëve, hapësirat e jashtme të të gjithë spitaleve dhe qendrave shëndetësore, të pastrohen nga kioskat apo ndërtimet e paligjshme dhe këto hapësira, nga burim ndotje, të jenë hapësira të gjelbëruara në funksion të qytetarëve”.
Po nga Elbasani filloi njëherësh aksioni i gjelbërimit të ambienteve të jashtme të spitaleve, me mbjelljen e pemëve dhe sistemimin e territorit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.