Nis shitja e pasurive të konfiskuara – Më 28 korrik gjashtë ankandet e para, vlera totale e aseteve të marra nga shteti 20 milionë euro
Ministria e Financave do të nisë shitjen e pasurive të konfiskuara të cilat kanë kaluar në pronësi të shtetit me vendim gjykate. Ajo ka shpallur 6 ankandet e para që do të bëhen për llogari të Agjencisë së Administrimit të Pasurive të Sekuestruara dhe të Konfiskuara. Bëhet fjalë për dy toka arë, dy bodrume, dhe asetet e dy bizneseve. Vlera e pronave në total llogaritet nga agjencia në rreth 600 mijë dollarë, mes të cilave vetëm një prej tokave arë llogaritet me vlerë fillestare afërisht 300 mijë dollarë.
Ministria ka shoqëruar njoftimet edhe me rregullat e pjesëmarrjes. Çdo person fizik apo juridik i interesuar për blerje me ankand duhet të paraqesë në vendin, datën dhe orën e njoftuar pranë komisionit të ankandit dokumentacionin si më poshtë:
1. Kërkesë me shkrim për blerjen e objektit apo ndermarjes e regjistruar pranë protokollit të Ministrisë së Financave dhe Ekonomise.
2. Mandat pagesën apo Garancinë bankare në origjinal që vërteton derdhjen apo ngurtësimin e 20 % të vlerës së fillimit të ankandit, në lekë për llogari të Agjencisë së Administrimit të Pasurive të Sekuestruara dhe të Konfiskuara.
3. Deklarimin personal të secilit pjesëmarrës, që verteton se ky i fundit nuk është në konflikt interesi, sipas dispozitave të ligjit Nr. 10192, datë 03.12.2009, të ndryshuar dhe të ligjit Nr. 34/2019, të ndryshuar.
Sipas të dhënave zyrtare të Agjencisë, në vitin 2020, ka arritur në total në 20 milionë euro vlera e pasurive të konfiskuara dhe të marra nën administrim nga shteti, ndërkohë që vlera totale e aseteve të vëna nën sekuestro që nga viti 2011 është 54 milionë euro. Për vitin 2020 pasuritë e sekuestruara janë gjithsej 230, nga të cilat 207 janë të vlerësuara dhe 23 janë në proces.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.