Nisin aplikimet për subvencionet në bujqësi – Çuçi: Ja cilët janë sektorët që përfitojnë mbështetje
Ministri i Bujqësisë dhe Zhvillimit Rural, Bledi Çuçi ka njoftuar se prej ditës së djeshme kanë nisur aplikimet online për subvencionet në bujqësi për vitin 2020 përmes portalit E-Albania si dhe u bën thirrje fermerëve të aplikojnë për këto fonde deri më datë 19 qershor. Ai shpjegoi edhe njëherë cili është fokusi i Skemës Kombëtare të këtij viti.
“Përfitues të kësaj skeme në radhë të parë janë fermerët që merren me blegtori, të cilët do të marrin mbështetje drejtpërdrejtë për tufën e matrikulluar. Mbështetje kemi edhe për serrat e tunelet plastike që do të rinovojnë plastmasin. Gjithashtu do të japim subvencione për sipërmarrjet që do të kërkojnë të marrin certifikimin Global GAP, për rritjen e konkurrueshmërisë në tregjet ndërkombëtare, si dhe për sektorin e bletarisë”, tha ministri Çuçi.
Sipas ministrit dita e parë ka pasur një fluks të lartë aplikimesh nga fermerët dhe e gjithë procedura kryhet online me zero dokumente. Sipas tij fillimisht do të bëhet regjistrimi në e-Albania, si qytetar, me të dhënat e kartës së identitetit e më pas do të zgjidhet lloji i fermerit, vendndodhja e fermës, masa si dhe sasia për të cilën do të aplikohet. “Më pas klikon dërgo. Në Skemën Kombëtare 2020 të mbështetjes së fermerëve janë parashikuar 743,9 milionë lekë dhe pritet të përfitojnë rreth katër mijë fermerë në të gjithë vendin.”
E . S / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.