Panairi i punës – Ahmetaj: 1200 vende të lira pune në qarkun e Shkodrës e Lezhës

Më shumë se 40 sipërmarrje kanë marrë pjesë në Panairin e parë të Punës të zhvilluar dje në qarkun e Shkodrës nga Ministria e Financave dhe Ekonomisë, ku kanë deklaruar 760 vende të lira pune.

Të papranishëm në këtë panair ishin edhe ministri Arben Ahmetaj, ministri për Europën dhe punët e Jashtme, Ditmir Bushati si dhe deputetë të qarkut.

Ministri Ahmetaj deklaroi se në qarkun e Shkodrës dhe të Lezhës janë 1200 vende të lira pune, duke shtuar se duhet të punohet më tepër për arsimin profesional për ta afruar tregun me aftësitë e punëkërkuesve. Në kuadër të punësimit dhe mbështetjes për të rinjtë, ai tha se qeveria ka kaluar edhe 7 programe mbështetjeje.

“Unë do t’i referohesha edhe disa programeve të tjera të qeverisë që kanë të bëjnë me punësimin dhe mbështetjen për të rinjtë. Qeveria javën e kaluar kaloi 7 programe mbështetje dhe këtu është detyra e Zyrave të Punës, së bashku me Shkollat Profesionale, që të trokasin derë më derë tek ata të rinj e të reja, qytetarë e qytetare që janë të regjistruar në listën e punëkërkuesve”, tha Ahmetaj.

Duke ju referuar të dhënave të Bankës Botërore, Ahmetaj u shpreh se Shqipëria e ka lënë pas krizën e viteve 2013 dhe është futur në rrugën e zhvillimit, duke cilësuar punësimin si kryefjalën e qeverisë.

“BB, pasi na ka skanuar e studiuar në thellësi, del në konkluzion se Shqipëria e ka lënë pas krizën e viteve 2013. E ka lënë pas atë mundësinë që të kalonte një krizë si Greqia dhe sot është futur në rrugën e zhvillimit të qëndrueshëm ekonomik madje, për shkak të politikave shumë të kujdesshme të qeverisë Rama 1 dhe Rama 2, sot punësimi është fjala kryesore e punës së përditshme të qeverisë dhe sot papunësia është më e ulta historike, megjithëse akoma ka shumë shqiptarë, shumë qytetarë, shumë të rinj e të reja të papunë e që kërkojnë punë.”

Ministria e Financave do të organizojë panaire pune edhe në qarqe të tjera të vendit, për t’i paraprirë Panairit Kombëtar që mbahet çdo vit në maj, në Tiranë.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.