Parku i ri qendror në Tiranë – Veliaj: Bashkia do të transferohet në Bulevardin e Ri
Zhvillimi i mëtejshëm i zonës së Bulevardit të Ri të Tiranës parashikon ndërtimin e një parku të ri qendror dhe të një sheshi ceremonial si ai në fund të Bulevardit “Nënë Tereza”. Kështu është shprehur Kryetari i Bashkisë së Tiranës, Erion Veliaj, gjatë një eventi për ecurinë e projektit të Bulevardit të Ri.
“Bulevardi do të përfundojë me një shesh ceremonial, i cili bashkë me parqet lineare, por edhe parkun qendror në krah të djathtë do të jetë ndoshta hapësira më e madhe rekreative brenda Tiranës, e ngjashme në përmasa me parkun e Liqenit të Tiranës ose parkun e Farkës dhe shumë herë më e madhe se parku Rinia që është në qendër të qytetit”, tha Veliaj
Projekti është vlerësuar për rëndësinë e tij edhe nga kryeministri Rama, i cili e ka quajtur veprën e dytë më të madhe në historinë e Tiranës sa i përket masës së gjelbër.
Kryebashkiaku Erion Veliaj vijoi duke treguar se në fund të verës do të hapet edhe rruga “Siri Kodra”, e cila do të lidhë njësitë 8 dhe 9 mespërmes bulevardit, i cili krahas funksionit rekreativ do të ketë edhe funksionin e tij primar, të transportit.
Sipas Veliajt kjo do të nxisë zhvillimin në të dyja krahët e bulevardit, ku Bashkia dhe 4 ambasada po planifikojnë të zhvendosen
“Ne kemi vendosur që Bashkia e Re e Tiranës gjithashtu të transferohet në Bulevardin e Ri. Si një mënyrë për ta çliruar edhe ne qytetin nga rreth 100 zyra bashkiake, dhe për t’i koncentruar të gjitha shërbimet administrative në fillim të Bulevardit të Ri, duke dhënë vetë ne shembullin e parë se si mund të shfrytëzohet kjo valvul e re e shkarkimit urbanistik të Tiranës”, u shpreh Veliaj.
Plani i qeverisë Rama është të vazhdojë me unazën e pestë, e cila do ta bënte jo vetëm daljen dhe hyrjen nga Tirana nëpërmjet këtij bulevardi shumë më të thjeshtë, por do të krijonte edhe lidhjen me rrugën e Rinasit dhe aeroportin.
A.H./SCAN
Bulevardi i Ri do të strehojë 100 mijë banorë – Rama: Uroj të shohim sa më shpejt kulla të reja
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.